Jańalyqtar
Mektepke jańadan kelgen oqýshynyń ata-anasy muǵalimdi negizsiz jumystan shyǵartyp jibergen
Foto: ashyq derekkóz
Almatydaǵy mektep-lıeılerdiń birinde ata-analar muǵalimdi jumystan shyǵýǵa májbúrlegen. Stan.kz tilshisine bir ata-ananyń pedagogti jumystan shyǵýǵa ıtermelegeni aıtyldy, dep habarlaıdy qandastar.kz
Naýryzbaı aýdanyndaǵy №207 mektep-lıeıinde 3-synyp oqýshylarynyń ata-analary synyp jetekshisiniń jumystan shyǵyp ketkenine narazy bolyp otyr.
Negizi synypta 35 oqýshy bolǵan. Biraq bir oqýshy qyrkúıekte jańadan kelgen.
«Kelgeli muǵalimge tynym joq. Dırektorǵa apaıdyń ústinen shaǵym túsirgen. Bolmaǵan soń dırektor ata-analar jınalysyn jasady. Biraq pedagogtiń ústinen aryz jazǵan ata-ana jınalysqa kelmedi. Muǵalimimizdiń 35 jyldyq tájirıbesi bar. Kelesi jyly zeınetke shyqqaly otyr. Tájirıbeli muǵalim bolǵandyqtan ol kisini qaıtarǵymyz keledi. Biz de shaǵym túsirgen ata-anamen ózimiz sóıleskimiz keldi. Biraq ol kezdesip, sóılesýden bas tartty. Onyń maqsaty – apaıdy jumystan shyǵarý. Munyń barlyǵy bir aıdyń ishinde bolyp otyr. Balalarymyz muǵalimniń óz erkimen jumystan shyǵyp ketkenin aıtty. Aıtýynsha, muǵalimimiz jylap ketipti», – deıdi ata-ananyń biri.
Ata-ananyń aıtýynsha, mektep dırektory shaǵym túsirgen anamen sóılesip, balasyn basqa mektepke aýystyrýyn usynǵan. Alaıda ol basqa mektepke aýysýdan bas tartqan. Biraq jańadan kelgen oqýshy men onyń ata-anasyna mekteptegiler narazy.
«Ol áıel úıde otyryp alyp bárin búldiredi, muǵalimdi jylatyp, keshirim suratady. Ol kisimen oqý isiniń meńgerýshisi sóılesken. Sonda «Mazamdy almańyzdar. Aıtarymdy aıttym. Qoldaryńyzdan ne keledi, jasaıtyndaryńyzdy jasańyzdar» dep aıǵaılap jaýap berdi», – deıdi ashynǵan ata-ana.
