جاڭالىقتار
«مەكتەپتە 10 ادامدى ولتىرگەن»: سەربيادا 13 جاستاعى بالاسىنىڭ قىلمىسى ءۇشىن اتا-اناسى سوتتالدى
Theguardian.com مالىمەتىنشە, سوت پروتسەسى تەك ءجاسوسپىرىمنىڭ اتا-اناسى ۆلاديمير مەن ميليانا كەچمانوۆيچكە قاتىستى ءوتتى, سەبەبى ولاردىڭ بالاسى قىلمىستىق جاۋاپكەرشىلىككە تارتىلۋعا تىم جاس ەدى.
بەلگراد جوعارعى سوتى ۆلاديمير كەچمانوۆيچتى 14 جىل 6 ايعا, ال ميليانا كەچمانوۆيچتى 3 جىلعا باس بوستاندىعىنان ايىرۋعا ۇكىم شىعارعانىن مالىمدەدى.
پروكۋرورلار اكەسىن ۇلىنا قارۋ قولدانۋدى ۇيرەتىپ, قارۋ مەن وق-ءدارىنى دۇرىس ساقتاماعانى ءۇشىن ايىپتادى. سونىمەن قاتار, ول ۇلىنا ريۋكزاگىنا تاپانشا مەن 92 وق جاسىرعانى ءۇشىن جاۋاپتى دەپ تانىلدى. بۇل قارۋدى ءجاسوسپىرىم اتىس كەزىندە قولدانعان.
“ۆلاديمير كەچمانوۆيچ قوعامدىق قاۋىپسىزدىككە اۋىر قىلمىس جاساعانى جانە كامەلەتكە تولماعانعا قاتىگەزدىك تانىتقانى ءۇشىن كىنالى دەپ تانىلدى, ميليانا كەچمانوۆيچ كامەلەتكە تولماعانعا نەمقۇرايلى قاراعانى ءۇشىن كىنالى دەپ تانىلدى, بىراق قارۋ-جاراقتى زاڭسىز ساقتاۋ نەمەسە ساۋدالاۋ ايىبىنان بوساتىلدى” دەلىنگەن سوت شەشىمىندە.
اتىس الاڭىنىڭ نۇسقاۋشىسى, ۆلاديمير كەچمانوۆيچتىڭ ۇلىن جاتتىقتىرعانى ءۇشىن, 1 جىل 3 ايعا سوتتالدى.
ايىپتاۋشى دا, قورعاۋشى تاراپ تا ۇكىمگە شاعىم تۇسىرەتىنىن مالىمدەدى. باس پروكۋرور نەناد ستەفانوۆيچ اكەنىڭ جانە نۇسقاۋشىنىڭ جازاسىن قاتاڭداتۋدى, سونداي-اق اناسىنا قاتىستى كەيبىر ايىپتاردى قايتا قاراۋدى تالاپ ەتتى.
جابىرلەنۋشى بالالاردىڭ وتباسىلارىنىڭ ادۆوكاتى وگنەن بوجوۆيچ ۇكىمگە قاناعاتتانعانىن ءبىلدىردى. دەگەنمەن, ول ەشبىر جازا وتباسى ءۇشىن تولىق ادىلدىك اكەلمەيتىنىن ايتتى.
جابىرلەنۋشىلەردىڭ اتا-انالارى سوت زالىندا ۇكىمدى تىڭداپ, قاتتى اسەر الدى. ستۋدەنتتەردىڭ توبى سوت عيماراتىنىڭ الدىنا گۇل شوقتارىن قويىپ, قۇربانداردى ەسكە الۋ ءۇشىن 10 مينۋت ءۇنسىز تۇردى.
ءجاسوسپىرىم وقيعادان كەيىن پسيحياتريالىق اۋرۋحاناعا جاتقىزىلدى جانە العاش رەت قازان ايىندا اتا-اناسىنا قارسى سوتتا كۋالىك بەرۋگە شىعارىلدى.
11 ايعا سوزىلعان سوت پروتسەسى جابىق ەسىك جاعدايىندا ءوتتى, بىراق سوڭعى شەشىم جۇرت الدىندا جاريالاندى. ۆلاديمير كەچمانوۆيچ سوت شەشىمىنەن كەيىن قايتا قاماۋعا الىندى, ال ميليانا كەچمانوۆيچ سوڭعى ۇكىمگە دەيىن بوستاندىقتا قالادى.
وسى وقيعادان بىرنەشە كۇن وتكەن سوڭ, بەلگرادتان 60 شاقىرىم جەردە تاعى ءبىر اتىس بولىپ, 21 جاستاعى ەر ادام 9 ادامدى ءولتىردى. وعان 20 جىل تۇرمە جازاسى بەرىلدى.
بۇل وقيعالار وتكەن جىلى جاپپاي انتيۇكىمەتتىك نارازىلىقتارعا تۇرتكى بولدى. مىڭداعان ادام كەيبىر شەنەۋنىكتەردىڭ وتستاۆكاعا كەتۋىن جانە مەدياداعى زورلىق-زومبىلىقتى ناسيحاتتاۋدى توقتاتۋدى تالاپ ەتتى.
