مەكتەپتەگى «دەدوۆششينا»: قىزىلوردادا وقۋشىلار توبەلەسىپ, بىرەۋى اۋرۋحاناعا تۇسكەن

فوتو: اشىق دەرەككوز

شيەلى اۋدانىنىڭ ورتالىعىندا ورنالاسقان №127 مەكتەپ-ليتسەيىندە وقۋشىلار توبەلەسكەن, دەپ حابارلايدى qandastar.kz

قىزىلوردا وبلىستىق دەنساۋلىق ساقتاۋ باسقارماسىنىڭ مالىمدەۋىنشە, شيەلى اۋدانىندا 5 قازاندا مەكتەپتە وقۋشىلار اراسىندا توبەلەس ورىن العان.

«ناتيجەسىندە ءبىر ءجاسوسپىرىم شيەلى اۋداندىق كوپ بەيىندى ورتالىق اۋرۋحاناسىنا جاتقىزىلعان. بۇگىنگى كۇنى بالا قاناعاتتانارلىق جاعدايدا ۇيىنە شىعارىلعان. ناۋقاستىڭ اۋرۋحاناعا جاراقاتپەن تۇسكەندىگى ىشكى ىستەر ورگانىنا حابارلاندى», – دەپ حابارلادى باسقارما.

قىزىلوردا وبلىسى پوليتسيا دەپارتامەنتى اتالعان دەرەك بويىنشا ءىس قوزعالعانىن مالىمدەدى.

«شيەلى اۋداندىق پوليتسيا ءبولىمى قر قىلمىستىق كودەكسىنىڭ 293-بابىنىڭ 3-بولىگىمەن (پىشاقتاردى, كاستەتتەردi جانە وزگە دە سۋىق قارۋدى قولدانۋ) قىلمىستىق ءىس تىركەپ, تەرگەپ-تەكسەرۋ جۇرگىزۋدە», – دەلىنگەن دەپارتامەنتتىڭ اقپاراتىندا.

ايتا كەتەيىك, وقۋشىلار اراسىنداعى توبەلەس شيەلى اۋدانىندا ءبىرىنشى رەت بولىپ تۇرعان جوق. بيىل مامىر ايىندا ش.قودامانوۆ اۋىلىندا جوعارى سىنىپ وقۋشىلارى وزدەرىنەن كىشى بالالارعا «امانداسپاعانى» ءۇشىن الىمجەتتىك كورسەتىپ, ولاردى ۇرىپ-سوققان. سالدارىنان 9 سىنىپ وقۋشىسى وقيعا ورنىندا كوز جۇمعان بولاتىن. بۇل ءىس بويىنشا ۇكىم شىقتى. كىنالىلەردىڭ ءبىرى 6,8 جىلعا باس بوستاندىعىنان ايىرىلدى.