جاڭالىقتار
مەكتەپتەردە «111» بايلانىس ورتالىعىنىڭ QR-كودى ەنگىزىلدى
فوتو: اشىق دەرەككوز
قاڭتاردان باستاپ مەكتەپ پەن كوللەدجدە «111» بايلانىس ورتالىعىنا قولجەتىمدىلىكتى ارتتىرۋ ءۇشىن ارنايى تار ەنگىزىلدى. بۇل ورتالىق وتباسى, ايەلدەر مەن بالالاردىڭ قۇقىقتارىن قورعاۋدا قۇقىقتىق, ۇيىمداستىرۋشىلىق جانە پسيحولوگيالىق كومەك كورسەتەدى, دەپ جازدى qandastar.kz
ەندى «111» نومىرىنە قوڭىراۋ شالۋ مۇمكىندىگىنەن باسقا, بالالار مەن ولاردىڭ اتا-انالارى QR-كودتار ارقىلى سۇراۋ جىبەرە الادى. ولار بارلىق ءبىلىم بەرۋ ۇيىمدارىندا, بالالار ءۇشىن قولجەتىمدى ورىنداردا, سونداي-اق اۆتوبۋس ايالدامالارىندا ورنالاسقان. اتالعان جاڭالىق كومەك الۋدىڭ قولايلىلىعى مەن قولجەتىمدىلىگىن ارتتىرۋعا باعىتتالعان.
«بۇرىن بالالار بايلانىس ورتالىعىنا تەك تەلەفون ارقىلى عانا حابارلاسا الاتىن, ال ەندى ولاردىڭ QR-كودتار ارقىلى سۇراۋ جىبەرۋ مۇمكىندىگى بار. بۇل قولداۋعا جۇگىنۋ پروتسەسىن ايتارلىقتاي جەڭىلدەتەدى, ونى نەعۇرلىم ىڭعايلى جانە قولجەتىمدى ەتەدى. QR-كودتار قاجەتتى اقپارات پەن كومەكتى جىلدام جانە ءانونيمدى الۋعا مۇمكىندىك بەرەدى, بۇل بالالاردىڭ ساۋالدارى مەن ماسەلەلەرىنە جەدەل دەن قويۋعا مۇمكىندىك بەرەدى», – دەپ اتاپ ءوتتى قر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتورايىمى ناسىمجان وسپانوۆا.
وتكەن جىلدىڭ قورىتىندىسى بويىنشا «111» بايلانىس ورتالىعىنا بالالاردان 1000-عا جۋىق ءوتىنىش كەلىپ ءتۇستى. ولارعا انىقتامالىق اقپارات بەرىلىپ, پسيحولوگيالىق قولداۋ كورسەتىلىپ, مەملەكەتتىك ورگاندارمەن ىنتىماقتاستىقتا ۋاقىتىلى كومەك ۇيىمداستىرىلدى.
ەستەرىڭىزگە سالا كەتەيىك, 2024 جىلدىڭ شىلدەسىندە مەملەكەت باسشىسى قابىلداعان ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرى جونىندەگى زاڭ اياسىندا «111» بايلانىس ورتالىعىنىڭ قىزمەتى بەكىتىلگەن بولاتىن.
