مەكتەپتەردە قۇرامىندا ەسىرتكى بار «قۇلپىناي كۆيك» كامپيتتەرى تاراتىلعانى جايلى اقپارات تارادى

فوتو: WhatsApp چاتتارىنان

WhatsApp چاتتارىندا مەكتەپتەردە بالالارعا «قۇلپىناي كۆيك» كامپيتتەرى جانە قۇرامىندا ەسىرتكى – كريستالدى مەتامفەتامين بار باسقا دا زاتتار ۇسىنىلۋى مۇمكىن ەكەندىگى تۋرالى اقپارات تارالدى. بۇل تۋرالى qandastar.kz    Stan.kz اقپارات اگەنتتىگىنە سىلتەمە جاساپ حابارلايدى.

مالىمەتتەرگە سەنسەك, اقپاراتتا جەمىس ءدامى بار كريستالدى مەتامفەتامين كامپيت تۇرىندە ساتىلىپ, بالالارعا تاراتىلىپ جاتىر دەلىنگەن. جەلىدە اتا-انالار بۇل ەسىرتكى تۋرالى ءبىلۋى كەرەك ەكەنىن جانە «قۇلپىناي كۆيك» دەپ اتالاتىنىن ايتتى.

«قازىر مەكتەپتەردە وتە قورقىنىشتى جاعداي ورىن الۋدا, بۇل تۋرالى ءبارىمىز حاباردار بولۋىمىز قاجەت. بۇل كريستالدى مەتامفەتاميننىڭ ءبىر ءتۇرى, ول كلۋبنيكالى كامپيتتەرگە (اۋىزدا جارىلاتىن جانە شيپىلدايتىن تاتتىلەر) ۇقسايدى. ونىڭ ءيىسى دە قۇلپىناي سياقتى. بۇل زاتتى مەكتەپ اۋلاسىندا بالالارعا تاراتىپ ءجۇر. ونى «قۇلپىنايلى مەتامفەتامين» نەمەسە «قۇلپىناي كۆيك» دەپ اتايدى. بالالار ونى كامپيت دەپ ويلاپ جەپ قويادى, سودان كەيىن اۋىر جاعدايدا اۋرۋحاناعا تۇسەدى. بۇل زات شوكولاد, جەرجاڭعاق مايى, كولا, شيە, ءجۇزىم جانە اپەلسين دامىنەن دە كەزدەسەدى», – دەپ جازعان اتا-انالار.

چاتتاردا اتا-انالار بالالارىڭىزعا بوتەن ادامداردان ەشقاشان ءتاتتى الماۋ كەرەك ەكەنىن ءتۇسىندىرىڭىز دەپ تاراتقان.

ء«تىپتى دوستارى بەرگەن ءتاتتىنى دە الۋعا بولمايدى (ولارعا دا بىرەۋ بەرگەن بولۋى مۇمكىن). ەگەر ولار كۇدىكتى نارسە تاپسا, ونى دەرەۋ مۇعالىمگە, مەكتەپ ديرەكتورىنا نەمەسە اتا-انالارىنا ايتۋى كەرەك», – دەلىنگەن اقپاراتتا.

الايدا بۇل دەرەك الدىمەن قىرعىز رەسپۋبليكاسىندا تارالعان بولىپ شىقتى. قىرعىزستاننىڭ ىشكى ىستەر مينيسترلىگى بۇل مالىمەتكە قاتىستى رەسمي تۇسىنىك بەردى. ۆەدومستۆو بۇل مالىمەتتەردىڭ شىندىققا جاناسپايتىنىن, فەيك اقپارات ەكەنىن حابارلادى.

ءىىم وكىلدەرىنىڭ ايتۋىنشا, مۇنداي ەسىرتكىنىڭ تارالۋى تۋرالى ەشقانداي رەسمي دەرەك جوق, بۇل حابارلاما بۇرىننان بەلگىلى فەيك.

«جالعان اقپارات 2007 جىلدان بەرى وزگە ەلدەردە تاراپ كەلە جاتقانىن جانە ەشبىر قۇقىق قورعاۋ ورگاندارى ونى راستاعان  ەمەس. تەك رەسمي اقپارات كوزدەرىنە سۇيەنىڭىز.  دەرەككوزدىڭ سەنىمدىلىگىنە كوز جەتكىزبەي, حابارلامالاردى تاراتپاڭىز», – دەپ حابارلادى قىرعىز ىشكى ىستەر مينيسترلىگى.

قىرعىزستاندا كەڭىنەن تاراعان بۇل حابارلاما قازاقستانعا دا جەتتى. WhatsApp  مەسسەندجەرىن پايدالانۋشىلارعا دا ءدال وسى مالىمەت كەلىپ جاتىر.

ال قازاقستاننىڭ ىشكى ىستەر مينيسترلىگى دە بۇل اقپاراتتىڭ جالعان ەكەنىن مالىمدەدى.

«WhatsApp چاتتارىندا مەكتەپتەردە بالالارعا «قۇلپىناي كۆيك» كامپيتتەرى جانە قۇرامىندا ەسىرتكى – كريستالدى مەتامفەتامين بار باسقا دا زاتتار ۇسىنىلۋى مۇمكىن ەكەندىگى تۋرالى اقپارات تارالۋدا. الايدا بۇل تارالىم شىندىققا جاناسپايدى», – دەلىنگەن رەسمي حابارلامادا.

وسى رەتتە مينيسترلىك قوعامدا دۇربەلەڭ نەمەسە باسقا دا جاعىمسىز سالداردى تۋدىرۋى مۇمكىن جالعان اقپاراتتى تاراتۋ قىلمىستىق جاۋاپكەرشىلىككە اكەپ سوعاتىنىن ەسكە سالدى.

ەسكە سالايىق, بۇعان دەيىن پرەزيدەنت قاسىم-جومارت توقاەۆ ەسىرتكى وندىرۋشىلەرگە جازانى قاتايتاتىن, ەسىرتكىنى جاسىرىن ورنالاستىرۋشىلارعا قولدانىلاتىن شارالاردى جۇمسارتۋدى قاراستىراتىن زاڭعا قول قويعانىن جازعان ەدىك. زاڭ ەسىرتكى ءوندىرىسى ءۇشىن عانا ەمەس, وسى قىلمىستىق ارەكەت ءۇشىن لاۋازىمدى ادامداردىڭ دا جاۋاپكەرشىلىگىن ەداۋىر قاتاڭداتتى. ەندى بۇل قىلمىسقا قاتىسى بار تۇلعالاردى مۇلكىن تاركىلەپ, 15 جىلدان 20 جىلعا دەيىن نەمەسە ءومىر بويى باس بوستاندىعىنان ايىرۋى مۇمكىن.