مەكتەپتەردە ءتورتىنشى توقسان باستالدى

فوتو:ۆاسيلي كراس

وقۋ جىلىنىڭ سوڭعى توقسانىنىڭ ۇزاقتىعى 8 وقۋ اپتاسىن قۇرايدى. 1 ساۋىردە باستالعان جاڭا وقۋ توقسانىنىڭ 25 مامىردا قورىتىندىلارى شىعارىلىپ, 2024-2025 وقۋ جىلى اياقتالادى, – دەپ حابارلايدى qandastar.kz وقۋ-اعارتۋ مينيسترلىگىنە سىلتەمە جاساپ.

جاڭا توقساندا اقجاردا جايلى مەكتەپ جۇمىسىن باستادى.

ءتورتىنشى توقسان قارساڭىندا ءوڭىر باسشىسى وقىتۋشىلار قۇرامىمەن جانە وقۋشىلاردىڭ اتا-انالارىمەن كەزدەستى.

اقجارداعى جاڭا №79 جالپى ءبىلىم بەرەتىن ورتا مەكتەپ «جايلى مەكتەپ» ۇلتتىق جوباسى اياسىندا سالىندى. بۇل ءبىلىم وشاعى مەملەكەت باسشىسى قاسىم-جومارت توقاەۆتىڭ ەلىمىزدە ءبىلىم الۋ ءۇشىن ساپالى جاعداي جاساۋ تۋرالى تاپسىرماسىن ىسكە اسىرۋدىڭ جارقىن ۇلگىسى.

مەكتەپ ديرەكتورىنىڭ م.ا. مانشۇك دوسجانوۆانىڭ ايتۋىنشا, وقۋ مەكەمەسى 300 ورىنعا شاقتالعان, زاماناۋي وقۋ كابينەتتەر, زەرتحانالارمەن جانە IT قۇزىرەتتىلىكتى دامىتۋ ءۇشىن ارنايى ايماقتارمەن جابدىقتالعان. مۇندا ەكى كومپيۋتەرلىك كابينەت جانە روبوتوتەحنيكا سىنىبى, STEM-زەرتحانا, شەبەرحانالار, زاماناۋي كىتاپحانا, وقۋ زالى, جايلى كوۋوركينگ الاڭدارى مەن قوزعالىسسىز جانە بەلسەندى ويىندارعا ارنالعان جابدىقتالعان الاڭدار, سونداي-اق سپورت جانە اكت زالدارى بار.

مەكتەپ وقۋشىلاردىڭ ءبىلىمى مەن شىعارماشىلىعىن دامىتۋ ءۇشىن بارلىق قاجەتتى زاتتارمەن جابدىقتالعان. ونىڭ ىشىندە ەرەكشە ءبىلىم بەرۋ قاجەتتىلىكتەرى بار بالالارعا جاعداي جاساۋعا كوڭىل بولىنگەن.

مەكتەپكە ازىرگە 325 بالا قابىلداندى, وقىتۋ ەكى اۋىسىمدا جۇرگىزىلەدى.

وبلىس اكىمى وقۋشىلاردىڭ اتا-انالارىمەن كەزدەسۋدە وسىنداي زاماناۋي مەكتەپتەردىڭ قۇرىلىسى وڭىردەگى ءبىلىم بەرۋ ساپاسىن جاقسارتۋداعى ماڭىزدى قادام ەكەنىن اتاپ ءوتتى.

«پرەزيدەنت تاپسىرماسى اياسىندا ءبىز ءبىلىم بەرۋ ينفراقۇرىلىمىن بەلسەندى دامىتىپ جاتىرمىز. جايلى مەكتەپتەر – بۇل جاڭا عيماراتتار عانا ەمەس, بالالارىمىزدىڭ دامۋىنا بارلىق جاعداي جاسالعان زاماناۋي ءبىلىم بەرۋ ورتالىقتارى. وقۋشىلارعا ساتتىلىك تىلەيمىن, وسىنداي جايلى جانە زاماناۋي ورتا ۇسىنعان بارلىق مۇمكىندىكتى ءتيىمدى پايدالانعاندارى ءجون. بيىل وبلىسىمىزدا 11 400 وقۋشىعا ارنالعان تاعى 13 جاڭا جايلى مەكتەپ اشىلادى. ءاربىر وقۋ ورنى ەڭ جوعارى ستاندارتتارعا ساي بولۋى ءۇشىن ءبىز وسى باعىتتا ودان ءارى جۇمىس ىستەيمىز», — دەپ اتاپ ءوتتى وبلىس اكىمى.

وقۋشىلاردىڭ اتا-انالارى العىس سوزدەرىن دە جەتكىزدى.

«بۇل – بىزگە ناعىز مەرەكە. اقجاردا تاعى ءبىر مەكتەپ اشىلدى. مەنىڭ نەمەرەلەرىم مەن جيەندەرىم وسىندا وقيدى. مەكتەپ وتە كەرەمەت, وتە ادەمى. مۇندا دومبىرا سىنىبى, قىزدار مەن ۇلدارعا ارنالعان شەبەرحانالار بار. قازىر بالالارعا ەڭ جاقسىسى عانا ۇسىنىلادى, اتا-انا رەتىندە بالالارىمىزدىڭ جايلى جانە زاماناۋي جاعدايدا وقيتىنىنا سەنىمدى بولا الامىز. مۇنى جۇزەگە اسىرعان بارشا ازاماتتارعا ۇلكەن راقمەت!»- دەدى ايناگۇل سابيتەەۆا.

«مەكتەپ وتە جاقسى. ساپالى ءبىلىم الۋ ءۇشىن قاجەت نارسەنىڭ ءبارى بار – روبوتوتەحنيكا كابينەتى, زەرتحانالار, اكت زالى, سپورتزالى. مەن نەمەرەلەرىمنىڭ وسىنداي جاقسى جاعدايدا وقىپ, بارلىق باعىتتا داميتىنىنا وتە قۋانىشتىمىن. وسى مەكتەپتى اشۋعا كومەكتەسكەن جاندارعا ريزاشىلىعىمدى بىلدىرەمىن», — دەدى مىرزاباي باباشەۆ.