Mektepterde tórtinshi toqsan bastaldy

Foto:Vasılıı Kras

Oqý jylynyń sońǵy toqsanynyń uzaqtyǵy 8 oqý aptasyn quraıdy. 1 sáýirde bastalǵan jańa oqý toqsanynyń 25 mamyrda qorytyndylary shyǵarylyp, 2024-2025 oqý jyly aıaqtalady, – dep habarlaıdy qandastar.kz Oqý-aǵartý mınıstrligine silteme jasap.

Jańa toqsanda Aqjarda jaıly mektep jumysyn bastady.

Tórtinshi toqsan qarsańynda óńir basshysy oqytýshylar quramymen jáne oqýshylardyń ata-analarymen kezdesti.

Aqjardaǵy jańa №79 jalpy bilim beretin orta mektep «Jaıly mektep» ulttyq jobasy aıasynda salyndy. Bul bilim oshaǵy Memleket basshysy Qasym-Jomart Toqaevtyń elimizde bilim alý úshin sapaly jaǵdaı jasaý týraly tapsyrmasyn iske asyrýdyń jarqyn úlgisi.

Mektep dırektorynyń m.a. Mánshúk Dosjanovanyń aıtýynsha, oqý mekemesi 300 orynǵa shaqtalǵan, zamanaýı oqý kabınetter, zerthanalarmen jáne IT quzyrettilikti damytý úshin arnaıy aımaqtarmen jabdyqtalǵan. Munda eki kompıýterlik kabınet jáne robototehnıka synyby, STEM-zerthana, sheberhanalar, zamanaýı kitaphana, oqý zaly, jaıly koýorkıng alańdary men qozǵalyssyz jáne belsendi oıyndarǵa arnalǵan jabdyqtalǵan alańdar, sondaı-aq sport jáne akt zaldary bar.

Mektep oqýshylardyń bilimi men shyǵarmashylyǵyn damytý úshin barlyq qajetti zattarmen jabdyqtalǵan. Onyń ishinde erekshe bilim berý qajettilikteri bar balalarǵa jaǵdaı jasaýǵa kóńil bólingen.

Mektepke ázirge 325 bala qabyldandy, oqytý eki aýysymda júrgiziledi.

Oblys ákimi oqýshylardyń ata-analarymen kezdesýde osyndaı zamanaýı mektepterdiń qurylysy óńirdegi bilim berý sapasyn jaqsartýdaǵy mańyzdy qadam ekenin atap ótti.

«Prezıdent tapsyrmasy aıasynda biz bilim berý ınfraqurylymyn belsendi damytyp jatyrmyz. Jaıly mektepter – bul jańa ǵımarattar ǵana emes, balalarymyzdyń damýyna barlyq jaǵdaı jasalǵan zamanaýı bilim berý ortalyqtary. Oqýshylarǵa sáttilik tileımin, osyndaı jaıly jáne zamanaýı orta usynǵan barlyq múmkindikti tıimdi paıdalanǵandary jón. Bıyl oblysymyzda 11 400 oqýshyǵa arnalǵan taǵy 13 jańa jaıly mektep ashylady. Árbir oqý orny eń joǵary standarttarǵa saı bolýy úshin biz osy baǵytta odan ári jumys isteımiz», — dep atap ótti oblys ákimi.

Oqýshylardyń ata-analary alǵys sózderin de jetkizdi.

«Bul – bizge naǵyz mereke. Aqjarda taǵy bir mektep ashyldy. Meniń nemerelerim men jıenderim osynda oqıdy. Mektep óte keremet, óte ádemi. Munda dombyra synyby, qyzdar men uldarǵa arnalǵan sheberhanalar bar. Qazir balalarǵa eń jaqsysy ǵana usynylady, ata-ana retinde balalarymyzdyń jaıly jáne zamanaýı jaǵdaıda oqıtynyna senimdi bola alamyz. Muny júzege asyrǵan barsha azamattarǵa úlken raqmet!»- dedi Aınagúl Sábıteeva.

«Mektep óte jaqsy. Sapaly bilim alý úshin qajet nárseniń bári bar – robototehnıka kabıneti, zerthanalar, akt zaly, sportzaly. Men nemerelerimniń osyndaı jaqsy jaǵdaıda oqyp, barlyq baǵytta damıtynyna óte qýanyshtymyn. Osy mektepti ashýǵa kómektesken jandarǵa rızashylyǵymdy bildiremin», — dedi Myrzabaı Babashev.