مەملەكەت اسكەري قىزمەتكەرلەردى تۇرعىن ءۇي تولەمدەرىنەن ايىرماق: اسكەريلەردىڭ ايەلدەرى جەلىدە نارازىلىق ءبىلدىردى

فوتو: ۆيدەودان سكرين

قازاقستاندىق اسكەري قىزمەتكەرلەردىڭ ايەلدەرى ايلىقتىڭ ازدىعىنا شاعىمدانىپ, اسكەريلەردى تۇرعىن ءۇي تولەمدەرىنەن ايىرۋ تۋرالى شەشىمگە نارازىلىق ءبىلدىردى, دەپ جازدى qandastar.kz

 بۇل تۋرالى Stan.kz اقپارات اگەنتتىگى “ازاتتىق راديوسىنا” سىلتەمە جاساپ حابارلايدى.

ايدانا دوساەۆا – اسكەري قىزمەتكەردىڭ ايەلى. ول جاقىندا مايور شەنىن العان كۇيەۋىنىڭ 320 مىڭ تەڭگە ايلىق الاتىنىن, مەملەكەت وسىعان دەيىن وتباسىنىڭ ءبىر جىرتىعىن جاماپ وتىرعان تۇرعىن ءۇي تولەمدەرىنەن ايىرعانىن ايتىپ, شىر-پىر بولدى.

“اسكەريدىڭ ايەلى رەتىندە بۇل – مەنىڭ جانايقايىم. كۇيەۋىم وفيتسەر بولۋ ءۇشىن 5 جىل وقىدى. قازىرگە دەيىن ول 270 مىڭ تەڭگە ايلىق الىپ ءجۇردى. ءبىر اي بۇرىن مايور شەنىن الىپ, ايلىعى 320 مىڭ تەڭگەگە وستى. ءبىز كوممۋنالدىق تولەمدەردى قوسقاندا 150 مىڭ تەڭگەگە پاتەر جالدايمىز. تۇرعىن ءۇي تولەمدەرىنەن 70 مىڭ تەڭگە قالادى. ارەڭ كۇن كورىپ ءجۇر ەدىك. اقشا جيناۋ, ساياحاتتاۋ, قىدىرۋ تۋرالى ايتپاي-اق قويايىن, بۇل – ءبىز ءۇشىن ارمان. ەندى وسى ايدان باستاپ بىزگە تۇرعىن ءۇي تولەمى بەرىلمەدى. نەگە اسكەريلەردى تىعىرىققا تىرەي بەرەسىزدەر? جورگەك كەرەك. كۇيەۋىم جۇمىستان كەلىپ تۇسكى ۋاقىتتا تاكسيمەن ادام تاسيمىن دەدى. ويتكەنى تۇسكى ۋاقىتتا تاكسي قىزمەتىن قولداناتىندار كوپ بولادى”, – دەپ شاعىمداندى جەلى قولدانۋشىسى.

ايدانا كۇيەۋىنىڭ دۇرىس ۇيىقتاماعاننان كوز الدىندا دەنساۋلىعى ناشارلاپ بارا جاتقانىن ايتتى. ول كۇن كورۋ ءۇشىن التىندارىن ساتا باستاعان. سونداي-اق كۇن سايىن ازىق-ت ۇلىك تە قىمباتتاپ جاتقانىن ەسكە سالدى.

بۇعان دەيىن اسكەريلەردىڭ ايلىعى از بولعاندىقتان ولارعا ءار وتباسى مۇشەسى ءۇشىن تۇرعىن ءۇي تولەمى بەرىلەتىن. الايدا قورعانىس مينيسترلىگى ماۋسىم ايىندا تۇرعىن ءۇي تولەمدەرىنىڭ ءوز ورنىمەن جۇمسالىپ جاتپاعانانىن جەلەۋ ەتىپ, ونى توقتاتىپ تاستادى. مينيسترلىكتىڭ مالىمەتىنشە, تۇرعىن ءۇي تولەماقىسىن تەك جالعا العان پاتەرگە, يپوتەكا تولەۋگە نەمەسە ءۇي الۋ ماقساتىنداعى جيناققا سالۋ كەرەك.

“وفيتسەر ءتىپتى كۋرەردەن دە از تابادى دەۋگە بولادى. الماتىدا كۋرەردىڭ اقشا تابۋ مۇمكىندىگى وفيتسەردەن كوبىرەك. ال وفيتسەر تاڭنان كەشكە دەيىن قاراۋىلدا تۇرادى. ول دۇرىس سۇراق قويىپ وتىر: كىشى وفيتسەرلىك قۇرامدى اقشالاي تولەمدەردەن ايىردى. ەندى ولاردىڭ الدىندا ديلەمما تۇر – ارى قاراي قالۋ ما, الدە كەتۋ مە? ەندى ءبارى, اسىرەسە كىشى وفيتسەرلەر جاپپاي جۇمىستان كەتۋى مۇمكىن”, – دەيدى شەكارا قىزمەتىنىڭ زاپاستاعى پودپولكوۆنيگى, بۇرىنعى اسكەري قىزمەتكەر عالىمجان سادۆاقاسوۆ.

ونىڭ ايتۋىنشا, قازىردىڭ وزىندە اسكەردە كادر تاپشىلىعى بايقالادى.

ساراپشىلاردىڭ سوزىنشە, مۇنداي جاعدايلار ازاماتتاردىڭ اسكەري قىزمەتكە دەگەن قىزىعۋشىلىعىن جويىپ, ءتىپتى ەلدىڭ قورعانىس قابىلەتىنە كەرى اسەرىن تيگىزەدى.

“مەنىڭ بىلۋىمشە, قارجىلاندىرۋدى كوبەيتۋ قاجەت دەگەن بەلگىلى ءبىر تۇسىنىك بار. بىراق مۇندا قاراجات بولىنەتىن قۇرىلىمدى دا ەسكەرۋ كەرەك. ەگەر اسكەردە سىبايلاس جەمقورلىق جوعارى بولسا, ەسەپ بەرەتىن ينستيتۋتتار جوق بولسا, اسكەردەگى الىمجەتتىك, زاڭعا قايشى قارىم-قاتىناستاردى انىقتاۋعا كومەكتەسەتىن تەتىكتەر بولماسا, ارميانىڭ قۇرىلىمى ءالسىز بولسا, ياعني ول دۇرىس ۇيىمداستىرىلماعان جاعدايدا, قارجىلىق سالىمدار ماسەلەنى تولىق شەشپەيدى”, – دەپ ءتۇسىندىردى ساياساتتانۋشى ديماش ءالجانوۆ.

عالىمجان سادۆاقاسوۆتىڭ ايتۋىنشا, مەملەكەت اسكەري قىزمەتكەرلەردىڭ جالاقىسىن ارتتىرۋعا قاۋقارلى, ول ءۇشىن تىم كوبەيىپ كەتكەن قىزمەت كورسەتۋشى قىزمەتكەرلەردىڭ شتات سانىن قىسقارتۋ كەرەك. ونىڭ سوزىنشە, مۇنداي قىزمەتتەردە كوبىنە جوعارعى وفيتسەرلىك قۇرام وكىلدەرىنىڭ جاقىن تۋىستارى وتىرادى, ال ولاردىڭ ەلدىڭ قورعانىس قابىلەتىنە ەشقانداي پايداسى جوق.