جاڭالىقتار
مەملەكەت باسشىسى فينليانديا پرەزيدەنتى الەكساندر ستۋببپەن كەزدەستى
فوتو: اقوردا
كليماتتىڭ وزگەرۋى جونىندەگى بۇۇ-نىڭ نەگىزدەمەلىك كونۆەنتسياسىنا قوسىلۋشى تاراپتاردىڭ 29-شى كونفەرەنتسياسى اياسىندا قاسىم-جومارت توقاەۆ فينليانديا پرەزيدەنتى الەكساندر ستۋببپەن كەزدەسۋ وتكىزدى, دەپ جازادى qandastar.kz
قاسىم-جومارت توقاەۆتىڭ ايتۋىنشا, فينليانديا – قازاقستاننىڭ سولتۇستىك ەۋروپا ايماعى مەن تۇتاس ەۋروپا وداعىنداعى سەنىمدى ءارى ۋاقىت تەزىنەن وتكەن سەرىكتەسى.
مەملەكەتتەر باسشىلارى ەكىجاقتى قارىم-قاتىناستى, اتاپ ايتقاندا, ساۋدا-ەكونوميكا جانە مادەني-گۋمانيتارلىق سالالارداعى بايلانىستاردى ودان ءارى دامىتۋعا بەيىل ەكەنىن جەتكىزدى. سونىمەن قاتار فارماتسەۆتيكا, ونەركاسىپتىك ماشينا جاساۋ جانە ينجەنەريا سياقتى سالالاردا فين كومپانيالارىمەن بىرلەسە قولعا العان جوبالاردىڭ تابىستى جۇزەگە اسىرىلىپ جاتقانىن اتاپ ءوتتى.
بۇدان بولەك, تاراپتار حالىقارالىق جانە وڭىرلىك كۇن تارتىبىندەگى وزەكتى ماسەلەلەر, سونداي-اق كوپجاقتى قۇرىلىمدار اياسىنداعى ىقپالداستىق جونىندە پىكىر الماستى. قازاقستان پرەزيدەنتى فينليانديانىڭ ەقىۇ-عا توراعالىق ەتۋ ىسىنە تابىس تىلەدى.
كەلىسسوزدەر قورىتىندىسى بويىنشا قازاقستان مەن فينليانديا پرەزيدەنتتەرى ءبىر-بىرىنە ساپارمەن بارۋعا كەلىستى. بۇل ساپارلار استانا مەن حەلسينكي اراسىنداعى ساياسي جانە ەكونوميكالىق سەرىكتەستىكتى نىعايتۋعا تىڭ سەرپىن بەرەدى.
