Memleket basshysy qazaqstandyqtardy Oraza aıt merekesimen quttyqtady

Foto: Aqorda

Memleket basshysy Qasym-Jomart Toqaev qazaqstandyqtardy Oraza aıt merekesimen quttyqtady, dep habarlaıdy  qandastar.kz

***

Qadirli otandastar!

Oraza aıt meıramy qutty bolsyn!

Tatýlyq pen baýyrmaldyq, jaqsylyq pen ıgilik saltanat quratyn osy qasterli merekeniń barsha musylman qaýymy úshin mán-mańyzy aıryqsha.

Ramazan aıynda ımandylyqqa, rýhanı tazarýǵa umtylǵan jurtymyz Aıt kúni aq dastarhan jaıyp, qonaqjaılyq kórsetedi. Bir-birine izgi tilegin arnaıdy. Muqtaj jandarǵa kómek qolyn sozyp, qamqorlyq tanytady. Sol arqyly adamgershilik qundylyqtar qoǵamymyzda tereń ornyǵa túsedi.

Oraza aıt merekesiniń taǵylymy ata saltymyzben tereń sabaqtasyp jatyr. Bizdiń dinimiz de, dástúrimiz de azamattardy birlik pen yntymaqqa úndeıdi, ózara syılas bolýǵa shaqyrady. Osy qasıetterimiz barda halqymyzdyń Ádiletti, Qaýipsiz, Taza ári Qýatty Qazaqstandy qurý týraly arman-muraty oryndalatynyna kámil senimdimin.

Barshańyzǵa baq-bereke tileımin! Ár shańyraqqa qut-bereke darysyn!

Aıt qabyl bolsyn, aǵaıyn!