Memleket basshysy Qurban aıt merekesimen quttyqtady

Memleket basshysy Qasym-Jomart Toqaev barsha musylman qaýymyn Qurban aıt merekesimen quttyqtady. El Prezıdenti bul kúnniń ımandylyq pen izgiliktiń sımvoly ekenin atap ótti, dep habarlaıdy Aqorda.

Aıt kúnderi muqtaj jandarǵa jaqsylyq jasap, kómek kórsetý – ata-babalarymyzdan jalǵasyp kele jatqan ıgi dástúr. Asyl dinimiz azamattardy bir-birin qurmetteýge, jaqyndaryna janashyr bolýǵa úndeıdi, – delingen quttyqtaýda.

Prezıdent Qurban aıttyń qoǵamdaǵy baýyrmaldyq pen syılastyqty dáripteıtinin aıtyp, halyqtyń birligi men yntymaǵy osy rýhanı qundylyqtar arqyly nyǵaıa túsetinin jetkizdi.

Qurban aıt – yrysty yntymaqtyń merekesi. Biz elimizdegi turaqtylyqtyń qadirin bilip, tatýlyqty saqtaý arqyly kez kelgen synnan súrinbeı ótip, bıik maqsattarǵa jetemiz. Ádiletti, Taza, Qaýipsiz ári Qýatty Qazaqstandy birge quramyz, – dedi Memleket basshysy.

Prezıdent barsha qazaqstandyqtarǵa aıt merekesi qut-bereke, amandyq pen molshylyq ákelsin degen tilegin bildirip, aıttan aıtqa aman-esen jete bereıik dep túıindedi.