Memleket basshysy Soltústik Qazaqstan oblysynyń evakýaııalanǵan turǵyndarymen kezdesti

Prezıdent Qasym-Jomart Toqaev Soltústik Qazaqstan oblysynyń sý basqan aýmaǵyn tikushaqpen aralap kórgennen keıin qarǵyn sý saldarynan evakýaııalanǵan aýdandardyń halqymen kezdesti.

Turǵyndarmen áńgimelesý barysynda Qasym-Jomart Toqaev shyǵyndardy óteý úshin memleket barlyq tıisti sharany qabyldaıtynyn aıtty. Qazirgi ýaqytta sý tasqynynan zardap shekken barlyq turǵynǵa birrettik kómek berilip jatyr jáne komıssııa múlik shyǵyndaryn eseptegennen keıin ótemaqy tólenedi. Turǵyn úıi jaramsyz azamattarǵa jańa baspana salynady jáne barlyq qajetti ınfraqurylymmen qamtamasyz etiledi. Sonymen qatar zardap shekken turǵyndardyń nesıeleri men zaımdaryn tóleý merzimi shegeriledi. 

Memleket basshysy eshbir azamat nazardan tys qalmaıtynyn atap ótti. 

– Qazir bárimiz óte kúrdeli kezeńdi bastan keship jatyrmyz. Bul – jalpyulttyq apat. Degenmen, bir jaǵynan alyp qarasaq, oń ózgerister de anyq baıqalady. Sýdyń beti qaıtyp keledi. Jaqyn aradaǵy 10 kúnde óte qaýipti bolady dep oılaımyn. Biraq biz elimiz boıynsha apat saldaryn joıý sharalaryn qabyldap jatyrmyz. Buǵan deıin aıtqanymdaı, Úkimet zardap shekken azamattardyń barlyǵyna qoldaý kórsetedi. Biz sý tasqyny saldarynan bolǵan barlyq shyǵyndy óteımiz. Árbir azamat, árbir otbasy memlekettiń qamqorlyǵynda bolady. Bul – men úshin basty mindet, – dedi Qasym-Jomart Toqaev.