مەملەكەتتىك اۋديت پروتسەستەرى تولىعىمەن اۆتوماتتاندىرىلادى

فوتو: اشىق دەرەككوز

قر جوعارى اۋديتورلىق پالاتاسى دەلەگاتسياسىنىڭ پورتۋگاليا رەسپۋبليكاسىنا جۇمىس ساپارى بارىسىندا جوعارى اۋديتورلىق پالاتانىڭ مۇشەسى راسۋل راحيموۆ شەتەلدىك ارىپتەستەرىن ەلىمىزدىڭ مەملەكەتتىك اۋديت پروتسەستەرىن اۆتوماتتاندىرۋ جانە قارجىلىق باقىلاۋ جۇيەسىن زاڭنامالىق تۇرعىدان نىعايتۋ سالاسىنداعى جەتىستىكتەرىمەن تانىستىردى, دەپ حابارلايدى qandastar.kz

قازاقستاندىق دەلەگاتسيانىڭ پورتۋگالياعا ساپارىنىڭ نەگىزگى ماقساتى – ليتۆا, پورتۋگاليا جانە تۇركيا اۋديتورلارى جوعارى اۋديتورلىق پالاتانىڭ قىزمەتىنە قاتىستى جۇرگىزىپ جاتقان «دارەجەسى بويىنشا تەڭ» تەكسەرۋدىڭ الدىن الا قورىتىندىلارىن قاراۋ, سونداي-اق پورتۋگاليالىق ارىپتەستەرىمەن تاجىريبە الماسۋ.

راسۋل راحيموۆ ءوز سوزىندە جوعارى اۋديتورلىق پالاتا وتكەن جىلى 214 ۇيىمدا 27 اۋديت جۇرگىزىپ, 11 ترلن تەڭگەنى قامتىعانىن اتاپ ءوتتى. 2023 جىلمەن سالىستىرعاندا تەكسەرۋلەر سانى 35%-عا ءوستى. بيىل 43 اۋديت جوسپارلانعان, بۇل 2024 جىلمەن سالىستىرعاندا 59%-عا كوپ.

«ءبىر اتاپ وتەرلىگى, 2025 جىلعا جوسپارلانعان 43 ءاۋديتتىڭ 30-ى تاۋەكەلدەردى باسقارۋ جۇيەسىنىڭ كومەگىمەن ىرىكتەلدى», — دەدى قر جوعارى اۋديتورلىق پالاتاسىنىڭ مۇشەسى.

وتكەن جىلى جوعارى اۋديتورلىق پالاتا 154 ملرد تەڭگەگە قارجىلىق بۇزۋشىلىق انىقتادى. وسى قارجىنىڭ 88%-ى نەمەسە 135 ملرد تەڭگەسى رەسپۋبليكالىق بيۋدجەتكە قايتارىلدى. بۇل – جوعارى كورسەتكىش.

راسۋل راحيموۆ وتكەن جىلى جوعارى اۋديتورلىق پالاتا ءوزىنىڭ اقپاراتتىق جۇيەسىنە اۋقىمدى ترانسفورماتسيا جۇرگىزە باستاعانىن اتاپ ءوتتى.

«ءبىز اۋديتورلار جۇمىسىنىڭ تيىمدىلىگىن ارتتىرۋ جانە تالداۋ ساپاسىن جاقسارتۋ ءۇشىن جاڭا ينتەللەكتۋالدى قۇرالداردى بىرىكتىردىك. باستى باسىمدىق – اۋديت پروتسەستەرىن بارىنشا اۆتوماتتاندىرۋعا قول جەتكىزۋ», — دەدى ول.

ماسەلەن, اۋديتورلارعا مەملەكەتتىك ورگاندار مەن ۇلتتىق كومپانيالاردىڭ ساتىپ الۋلارىن ناقتى ۋاقىت رەجيمىندە تالداۋعا, سالىق تۇسىمدەرى مەن بيۋدجەتكە تولەنەتىن باسقا دا تولەمدەردى كورىپ وتىرۋعا, سونداي-اق ءارتۇرلى وڭىرلەر مەن ەكونوميكانىڭ سالالارى بويىنشا دەرەكتەردى سالىستىرۋعا مۇمكىندىك بەرەتىن تالدامالىق مودۋل ەنگىزىلدى. تاعى ءبىر IT-باستاما – مەملەكەتتىك اۋديت وبەكتىسىنىڭ تسيفرلىق كابينەتىن ىسكە قوسۋ. ونى تەستىلەۋ جىل سوڭىنا قاراي اياقتالادى. بۇل سەرۆيس وبەكتىگە بارىپ تەكسەرۋ جۇرگىزۋلەردى قىسقارتۋعا جانە مەملەكەتتىك اۋديت شەڭبەرىندە قۇجات اينالىمىن ەلەكتروندىق فورماتقا بارىنشا كوشىرۋگە مۇمكىندىك بەرەدى. «ءبىز بولىنگەن بيۋدجەت قاراجاتىنىڭ كولەمىنە قاراي ءاربىر تەكسەرىلەتىن ۇيىمنىڭ بەيىنىن اۆتوماتتى تۇردە جاساي الامىز. بۇل دەرەكتەر تاۋەكەلدەردى باسقارۋ جۇيەسىنە اۆتوماتتى تۇردە ينتەگراتسيالانادى. بۇل تاۋەكەل دەڭگەيى جوعارى ۇيىمداردى انىقتاۋعا مۇمكىندىك بەرەدى», — دەپ اتاپ ءوتتى راسۋل راحيموۆ.

ول مەملەكەت باسشىسى جاڭا بيۋدجەت كودەكسىنە قول قويعاننان كەيىن قازاقستانداعى مەملەكەتتىك اۋديت جۇيەسى زاڭنامالىق تۇرعىدان كۇشەيەتىنىن دە اتاپ ءوتتى.

«ەندى ۇكىمەت پارلامەنتكە جىل سايىنعى بيۋدجەتتىڭ اتقارىلۋى تۋرالى ەسەپتى ۇسىناتىندىقتان, ول سونداي-اق ۇكىمەتتىڭ وتكەن قارجى جىلىنداعى رەسپۋبليكالىق بيۋدجەتتىڭ اتقارىلۋى تۋرالى ەسەبىنە بەرىلگەن جوعارى اۋديتورلىق پالاتا ۇسىنىمدارىنىڭ ورىندالۋى تۋرالى ەسەپ بەرۋى ءتيىس. بۇل – رەسپۋبليكالىق بيۋدجەت قاراجاتىن ءبولۋ مەن پايدالانۋدا قارجىلىق اشىقتىقتى قامتاماسىز ەتۋدەگى ماڭىزدى قادام», — دەدى جوعارى اۋديتورلىق پالاتا مۇشەسى.

ءسوز سوڭىندا جوعارى اۋديتورلىق پالاتانىڭ قىزمەتىنە جۇرگىزىلگەن «دارەجەسى بويىنشا تەڭ» تەكسەرۋ شەڭبەرىندە شەتەلدىك ارىپتەستەر بەرەتىن ساراپتامالىق باعالاۋلار قازاقستانداعى مەملەكەتتىك اۋديت جۇيەسىن ودان ءارى جەتىلدىرۋ جونىندەگى جۇمىستا تولىق ەسكەرىلەتىنىن اتاپ ءوتتى. «وسى تەكسەرۋدىڭ الدىن الا ناتيجەلەرىنە سۇيەنە وتىرىپ, جوعارى اۋديتورلىق پالاتا جاقسارتۋدى تالاپ ەتەتىن سالالاردا بەلسەندى جۇمىس ىستەۋدە», — دەپ قورىتىندىلادى راسۋل راحيموۆ.