مەملەكەتتىك قىزمەتكە ىرىكتەۋ ونلاين جۇزەگە اسادى

فوتو: اشىق دەرەككوز

مەملەكەتتىك قىزمەتكە ىرىكتەۋ بيىل تولىقتاي ونلاين جۇيەگە كوشەدى. اتالمىش جوبا بىلتىر 68 مەكەمەدە سىناقتان وتكىزىلىپ, وڭ ناتيجە كورسەتكەن, دەپ جازدى qandastar.kz

بۇل تۋرالى مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباي ايتتى. ازاماتتارعا كورسەتىلەتىن مەملەكەتتىك قىزمەتتەردى باقىلاۋ دا تسيفرلىق جۇيەدە جۇرگىزىلە باستاپتى.

مەملەكەتتىك قىزمەت ىستەرى اگەنتتىگى 2024 جىلعى اتقارىلعان جۇمىستى قورىتىندىلادى. ازاماتتارعا كورسەتىلەتىن قىزمەتتەردى باقىلاۋ – نەگىزگى مىندەتتىڭ ءبىرى.  وسى باعىتتا بىلتىر 150 مىڭنان استام بۇزۋشىلىق انىقتالعان. ونىڭ 37%-ءى ونلاين مونيتورينگ ناتيجەسىندە بەلگىلى بولعان.

دارحان جازىقباي, قر مەملەكەتتىك قىزمەت ىستەرى اگەنتتىگىنىڭ توراعاسى:

– سىزدەن مۇمكىن قاجەت ەمەس قۇجاتتاردى سۇراپ قالۋى مۇمكىن نەمەسە ءسىزدىڭ بەرگەن ءوتىنىشىڭىز 3 كۇندە ورىندالۋ كەرەك بولسا, ونى 5 كۇندە ورىنداپ جاتادى نەمەسە 2 اپتا ىشىندە قۇجات دايىنداپ بەرۋ كەرەك بولسا, ول 2 اپتا ەمەس, جاڭاعى 20 كۇنگە سوزىلىپ كەتۋى مۇمكىن. وسىنداي بۇزۋشىلىقتاردى مونيتورينگ ارقىلى اڭىقتاپ وتىرمىز.

مەملەكەتتىك قىزمەتتە ءبىر ورىن بوساسا وعان كەمىندە 4-5 ادام تالاسادى. تۇبىندە تامىر-تانىسى بارلار عانا جۇمىسقا قابىلدانادى دەگەن اڭگىمە قوعام اراسىندا ءجيى ايتىلادى. مىنە, وسىندايعا جول بەرمەۋ ءۇشىن بىلتىر كونكۋرستاردى ونلاين وتكىزۋ باستالدى. نە وزگەردى? بۇل جەردە ۇمىتكەردىڭ اتى-ءجونىن بايقاۋ بىتكەنگە دەيىن ەشكىم بىلمەيدى, ءتىپتى بەينەسىن دە كورە المايدى. بىلتىر وسى «ە–قىزمەت» جۇيەسى 68 مەملەكەتتىك ورگاندا سىناقتان وتكىزىلگەن. كونكۋرسقا 38 مىڭ ادام قاتىسىپ, كوپ ۇپاي جيناعان 6 مىڭ ۇمىتكەر جەڭىمپاز اتانىپتى. بيىل جىل سوڭىنا دەيىن بارلىق مەملەكەتتىك ورگان وسى تاسىلگە كوشەدى.

سالاۋات مۇكسىموۆ, قر مەملەكەتتىك قىزمەت ىستەرى اگەنتتىگى توراعاسىنىڭ ورىنباسارى:

– مەملەكەتتىك قىزمەتتى دامىتۋدىڭ 5 جىلدىق تۇجىرىمداماسى بەكىتىلدى. قازىرگى وزگەرىستەر, تسيفرلاندىرۋ سونىڭ اياسىندا جۇرگىزىلۋدە. سونداي-اق ەندى مەملەكەتتىك قىزمەتشىنى جاۋاپكەرشىلىكتەن بوساتۋ دەگەن بولمايدى. ءتىپتى ول جۇمىس ورنىن اۋىستىرعاننان كەيىن ول ادامنىڭ بۇرىن قابىلداعان شەشىمدەرىنەن كەمشىلىك انىقتالسا, سوعان جاۋاپ بەرەدى. ياعني موينىنان مىندەت تۇسپەيدى.

اۋداندىق جانە اۋىلدىق دەڭگەيدەگى لاۋازىمدارعا جوعارى وقۋ ورىندارىن ۇزدىك بىتىرگەندەر بايقاۋعا جىبەرىلمەيدى. قىزمەتكە بىردەن قابىلدانادى. بۇگىنگە دەيىن وسى تارتىپپەن 445 تۇلەك جۇمىسقا ورنالاسىپتى.