Memlekettik qyzmetke irikteý onlaın júzege asady

Foto: ashyq derekkóz

Memlekettik qyzmetke irikteý bıyl tolyqtaı onlaın júıege kóshedi. Atalmysh joba byltyr 68 mekemede synaqtan ótkizilip, oń nátıje kórsetken, dep jazdy qandastar.kz

Bul týraly Memlekettik qyzmet isteri agenttiginiń tóraǵasy Darhan Jazyqbaı aıtty. Azamattarǵa kórsetiletin memlekettik qyzmetterdi baqylaý da ıfrlyq júıede júrgizile bastapty.

Memlekettik qyzmet isteri agenttigi 2024 jylǵy atqarylǵan jumysty qorytyndylady. Azamattarǵa kórsetiletin qyzmetterdi baqylaý – negizgi mindettiń biri.  Osy baǵytta byltyr 150 myńnan astam buzýshylyq anyqtalǵan. Onyń 37%-i onlaın monıtorıng nátıjesinde belgili bolǵan.

Darhan Jazyqbaı, QR Memlekettik qyzmet isteri agenttiginiń tóraǵasy:

– Sizden múmkin qajet emes qujattardy surap qalýy múmkin nemese sizdiń bergen ótinishińiz 3 kúnde oryndalý kerek bolsa, ony 5 kúnde oryndap jatady nemese 2 apta ishinde qujat daıyndap berý kerek bolsa, ol 2 apta emes, jańaǵy 20 kúnge sozylyp ketýi múmkin. Osyndaı buzýshylyqtardy monıtorıng arqyly ańyqtap otyrmyz.

Memlekettik qyzmette bir oryn bosasa oǵan keminde 4-5 adam talasady. Túbinde tamyr-tanysy barlar ǵana jumysqa qabyldanady degen áńgime qoǵam arasynda jıi aıtylady. Mine, osyndaıǵa jol bermeý úshin byltyr konkýrstardy onlaın ótkizý bastaldy. Ne ózgerdi? Bul jerde úmitkerdiń aty-jónin baıqaý bitkenge deıin eshkim bilmeıdi, tipti beınesin de kóre almaıdy. Byltyr osy «E–qyzmet» júıesi 68 memlekettik organda synaqtan ótkizilgen. Konkýrsqa 38 myń adam qatysyp, kóp upaı jınaǵan 6 myń úmitker jeńimpaz atanypty. Bıyl jyl sońyna deıin barlyq memlekettik organ osy tásilge kóshedi.

Salaýat Múksimov, QR Memlekettik qyzmet isteri agenttigi tóraǵasynyń orynbasary:

– Memlekettik qyzmetti damytýdyń 5 jyldyq tujyrymdamasy bekitildi. Qazirgi ózgerister, ıfrlandyrý sonyń aıasynda júrgizilýde. Sondaı-aq endi memlekettik qyzmetshini jaýapkershilikten bosatý degen bolmaıdy. Tipti ol jumys ornyn aýystyrǵannan keıin ol adamnyń buryn qabyldaǵan sheshimderinen kemshilik anyqtalsa, soǵan jaýap beredi. Iaǵnı moınynan mindet túspeıdi.

Aýdandyq jáne aýyldyq deńgeıdegi laýazymdarǵa joǵary oqý oryndaryn úzdik bitirgender baıqaýǵa jiberilmeıdi. Qyzmetke birden qabyldanady. Búginge deıin osy tártippen 445 túlek jumysqa ornalasypty.