مەملەكەتتىك تۇرعىن ءۇيدى ءبولۋ كەزىندە بىرقاتار زاڭبۇزۋشىلىقتار تىركەلدى

فوتو:depositphotos.com

پاۆلودار وبلىسىندا مەملەكەتتىك تۇرعىن ءۇيدى ءبولۋ كەزىندە بىرقاتار زاڭبۇزۋشىلىقتار تىركەلدى, دەپ حابارلايدى qandastar.kz

Tengrinews.kz جازعانداي, جەلەزين اۋدانىنىڭ پروكۋراتۋراسى مەملەكەتتىك تۇرعىن ءۇيدى بەرۋ ءتارتىبىن ورەسكەل بۇزۋ فاكتىلەرىن انىقتاعان.

«اتاپ ايتقاندا, پاتەرلەر تۇرعىن ءۇي كوميسسياسىنىڭ شەشىمىنسىز جانە جالداۋ شارتىن جاساسپاي-اق لاۋازىمدى تۇلعالارعا بەرىلگەن. «كەل دە تۇرا بەر” قاعيداتى بويىنشا ارەكەت ەتكەن تاجىريبە قالىپتاسقان», – دەدى پاۆلودار وبلىسىنىڭ پروكۋراتۋراسى.

مىسالى, ءبىر مۇعالىم 2022 جىلدان بەرى جەتىم بالاعا ارنالعان پاتەردە تۇرىپ كەلگەن. سونىمەن قاتار, 70 جالعا الۋشى جالداۋ اقىسىن تولەمەگەن, بەرەشەك كولەمى شامامەن 6,5 ميلليون تەڭگەنى قۇرايدى. الايدا, اۋداننىڭ جەرگىلىكتى اتقارۋشى ورگاندارى جالداۋ اقىسىن ءوندىرىپ الۋ شارالارىن قابىلداماعان.

«كەيبىر جاعدايلاردا مەملەكەتتىك تۇرعىن ءۇي ءۇشىنشى تۇلعالارعا بەرىلگەن. كەزەكتە تۇرعاندار تىزىمىندە قايتىس بولعان ازاماتتار دا تىركەلگەن. ال اكىمدىك بالانسىندا 65 بوس تۇرعىن ءۇي بولسا دا, ولار مۇقتاج جاندارعا تاراتىلماعان. قازىردىڭ وزىندە تۇرعىن ءۇي كەزەگىندە 209 ادام تۇر», – دەپ قوستى پروكۋراتۋرا وكىلدەرى.

تەكسەرۋ قورىتىندىلارى مەملەكەتتىك قىزمەت ىستەرى اگەنتتىگىنىڭ ادەپ جونىندەگى كەڭەسىندە قارالدى. جىبەرىلگەن زاڭبۇزۋشىلىقتار ءۇشىن جەلەزين اۋدانىنىڭ ناقتى سەكتور ءبولىمى باسشىسىنا «قىزمەتىنە تولىق سايكەس ەمەستىگى تۋرالى» ەسكەرتۋ تۇرىندەگى تارتىپتىك جازا قولدانىلدى.