Memlekettik turǵyn úıdi bólý kezinde birqatar zańbuzýshylyqtar tirkeldi

Foto:depositphotos.com

Pavlodar oblysynda memlekettik turǵyn úıdi bólý kezinde birqatar zańbuzýshylyqtar tirkeldi, dep habarlaıdy qandastar.kz

Tengrinews.kz jazǵandaı, Jelezın aýdanynyń prokýratýrasy memlekettik turǵyn úıdi berý tártibin óreskel buzý faktilerin anyqtaǵan.

«Atap aıtqanda, páterler turǵyn úı komıssııasynyń sheshiminsiz jáne jaldaý shartyn jasaspaı-aq laýazymdy tulǵalarǵa berilgen. «Kel de tura ber” qaǵıdaty boıynsha áreket etken tájirıbe qalyptasqan», – dedi Pavlodar oblysynyń prokýratýrasy.

Mysaly, bir muǵalim 2022 jyldan beri jetim balaǵa arnalǵan páterde turyp kelgen. Sonymen qatar, 70 jalǵa alýshy jaldaý aqysyn tólemegen, bereshek kólemi shamamen 6,5 mıllıon teńgeni quraıdy. Alaıda, aýdannyń jergilikti atqarýshy organdary jaldaý aqysyn óndirip alý sharalaryn qabyldamaǵan.

«Keıbir jaǵdaılarda memlekettik turǵyn úı úshinshi tulǵalarǵa berilgen. Kezekte turǵandar tiziminde qaıtys bolǵan azamattar da tirkelgen. Al ákimdik balansynda 65 bos turǵyn úı bolsa da, olar muqtaj jandarǵa taratylmaǵan. Qazirdiń ózinde turǵyn úı kezeginde 209 adam tur», – dep qosty prokýratýra ókilderi.

Tekserý qorytyndylary Memlekettik qyzmet isteri agenttiginiń Ádep jónindegi keńesinde qaraldy. Jiberilgen zańbuzýshylyqtar úshin Jelezın aýdanynyń naqty sektor bólimi basshysyna «qyzmetine tolyq sáıkes emestigi týraly» eskertý túrindegi tártiptik jaza qoldanyldy.