«مەن قوقان-لوقى جاساپ تۇرعان جوقپىن, بىراق سوڭىنا دەيىن بارامىن»: دەپۋتاتتار ءوزارا سوزگە كەپ قالدى

فوتو: اشىق دەرەككوز

بۇگىن ماجىلىستە «جەر قويناۋىن پايدالانۋ» كودەسىنە ەنگىزىلگەن تۇزەتۋلەردىڭ تانىستىرىلىمى ءوتتى. سوندا «گەولوگيالىق اقپاراتتى ساقتاۋ, ەسەپكە الۋ, قولجەتىمدىلىگىن قامتاماسىز ەتۋ قۇزىرەتىن ۇلتتىق وپەراتورعا بەرۋ جونىندە» نورما كوزدەلگەن, دەپ حابارلايدى qandastar.kz atamekenbusiness_qaz-عا سىلتەمە جاساپ.

بىراق ماجىلىسمەن باقتىقوجا ىزمۇحامەتوۆ بۇعان قارسىلىق ءبىلدىرىپ, مەملەكەتتىك فۋنكتسيالاردى اكتسيونەرلىك قوعامعا بەرۋ قاۋىپتى ەكەنىن ايتتى.

«بۇل قۇجاتتى جاساقتاۋشىلار ۇلتتىڭ مۇددەسىن ءبىرىنشى ورىنعا قويۋ كەرەك. مەن وسى جەردى كىمنىڭ لوببيمەن اينالىسىپ وتىرعانىن بىلەمىن, ايتايىن با», – دەدى دەپۋتات.

سونداي-اق ماجىلىسمەندەر كونستيتۋتسيانىڭ 6-شى بابىندا «جەر مەن ونىڭ استىنداعى قازبا بايلىق حالىققا تيەسىلى, بىراق حالىق مەنشىگىن مەملەكەت باسقارادى» دەپ جازىلعانىن ەسكە سالدى.

ال جوبا اۆتورىنىڭ ءبىرى دەپۋتات البەرت راۋ پرەزيدەنتتىڭ تاپسىرماسىن ورىنداپ وتىرعانىن ايتىپ, ۇكىمەت قولداۋىمەن تانىستىرىلىم بولعانىن العا تارتتى.