«مەن ءوزىمدى قورعادىم»: ادام ولىمىنە اكەلگەن توبەلەس ءۇشىن ايىپتالعان قازاقستاندىق بوساپ شىقتى

فوتو: سكرين

قورعانامىن دەپ بايقاۋسىزدا ادام ءولتىردى دەپ ايىپتالعان پاۆلودارلىق جىگىتكە قاتىستى اتىشۋلى ءىس سوتتا قارالدى, دەپ حابارلايدى qandastar.kz اقپارات پورتالى Stan.kz-كە سىلتەمە جاساپ. 

قايعىلى وقيعا وتكەن جىلى 11 تامىزدا پاۆلودارداعى «گوگول» تۇنگى كلۋبىنىڭ جانىندا بولعان. بەينەباقىلاۋ كامەرالارىنان 23 جاستاعى جىگىتتىڭ ءوزى الدىمەن ەكى جاس جىگىتكە جاقىنداپ, ولاردىڭ بىرىنە شابۋىل جاساعانىن بايقاۋعا بولادى. ونىڭ قولىندا پىشاق بولعان, كەيىن ونى قالتاسىنا سالىپ قويعان.

ءبىراز ۋاقىتتان كەيىن جىگىتتەر اراسىندا توبەلەس باستالىپ, ەكەۋى جەرگە قۇلاعان. سوتتالۋشى شابۋىلداۋشىنى ۇرىپ-سوعىپ, ءوزىن قورعاۋعا تىرىسقان. ول ارتقا شەگىنىپ, جانجالدان قاشپاق بولعاندا قارسىلاسى وعان پىشاق سەرمەپ, ارتىنشا قۇلاپ قايتىس بولعان.

سوت-مەديتسينالىق ساراپتاما جاس جىگىتتىڭ ولىمىنە باس-مي جاراقاتى مەن ميىنا قان قۇيىلۋ سەبەپ بولعانىن انىقتادى.

وتكەن جىلى كۇزدە ءوزىن قورعاعان پاۆلودار تۇرعىنى جابىرلەنۋشىنىڭ ولىمىنە اكەپ سوقتىرعان دەنساۋلىققا قاساقانا اۋىر زيان كەلتىرگەنى ءۇشىن كىنالى دەپ تانىلىپ, 4,5 جىلعا سوتتالعان ەدى.

مارقۇمنىڭ اناسى بۇل جازانى تىم جەڭىل دەپ ساناپ, ونى قاتاڭداتۋدى تالاپ ەتتى. پروكۋراتۋرا جابىرلەنۋشىنى 8 جىلعا باس بوستاندىعىنان ايىرۋدى سۇرادى.

دەگەنمەن سوتتالۋشى جولاماننىڭ ادۆوكاتى  ايىپتالۋشى ءوزىن-ءوزى قورعاۋ ماقساتىندا عانا ارەكەت ەتكەنىن ايتىپ, اقتاۋدى سۇرادى. اپەللياتسيالىق سوت بەينەماتەريالداردى قايتا قاراپ, دارىگەرلىك ساراپتامانى تىڭدادى. تالقىلاۋ بارىسىندا مارقۇمنىڭ اناسى ءوز تالاپتارىن راستادى

«ونىڭ زاڭ بويىنشا جازالانۋىن قالايمىن. قانداي ءىس-ارەكەت جاساعانىن ءتۇسىنسىن. ول ءتىرى, بىراق مەنىڭ ۇلىم ەندى جوق…», – دەدى ايەل سوتقا.

سوتتالۋشى ءوز كىناسىن مويىندامادى.

«مەنىڭ نە ىستەۋىم كەرەك ەدى? ۇندەمەي ءولىپ, ونىڭ جانىڭدا جاتۋىم كەرەك پە ەدى? ءتىپتى جانۋار دا قاۋىپ تونگەندە  ءوزىن قورعايدى. ونىڭ اگرەسسياسىن كورگەندە, ءوزىمدى قورعاۋىم كەرەگىن ءتۇسىندىم. قولىندا پىشاعى بولدى, ال مەندە ەشتەڭە جوق. كەتىپ قالعىم كەلدى, بىراق ول مەنى جىبەرمەدى. ول پىشاعىن كەز كەلگەن ۋاقىتتا قولدانۋى مۇمكىن ەدى», – دەيدى سوتتالۋشى.

سوت دالەلدەمەلەردى ەگجەي-تەگجەيلى زەردەلەي كەلە, ءبىرىنشى ساتىداعى سوتتىڭ ۇكىمىن وزگەرتىپ, سوتتالعان ادامنىڭ ارەكەتىن قىلمىستىق كودەكستىڭ 106-بابىنىڭ 3-بولىگىنەن (دەنساۋلىققا قاساقانا اۋىر زيان كەلتiرۋ) 112-بابىنىڭ 2-بولىگىنە (قاجەتتi قورعانىس شەگiنەن شىعۋ كەزiندە دەنساۋلىققا اۋىر زيان كەلتiرۋ) قايتا سارالادى.

«قاۋىپسىزدىگى ەڭ تومەن مەكەمەدە ءبىر جىلعا باس بوستاندىعىنان ايىرۋ جازاسى تاعايىندالسىن. ۇكىمگە ەسەپتەلگەن قاماۋدا بولعان ۋاقىتىن ەسكەرە وتىرىپ, ەكى تاۋلىككە ءبىر تاۋلىك ەسەبىمەن سوتتالۋشى جازاسىن وتەدى دەپ ەسەپتەلىپ, ول دەرەۋ قاماۋدان بوساتىلسىن», – دەپ حابارلادى پاۆلودار وبلىستىق سوتىنىڭ قىلمىستىق ىستەر جونىندەگى سوت القاسىنىڭ توراعاسى مۇرات سولتىباەۆ سوت قاۋلىسىندا.