«Men Perızat emespin!» – Balasynyń emine 1,3 mlrd jınaǵan ana óz shyndyǵyn aıtty

Qazaqstanda 1,3 mıllıard teńge kóleminde jınalǵan qaıyrymdylyq qarajatynyń talan-tarajǵa túsýi qoǵamda úlken rezonans týdyrdy. Qarjy monıtorıngi agenttiginiń málimetinshe, bul somany balasynyń emine dep jınaǵan Tolqyn Totaqanova men onyń kúıeýi jeke bas múddesi úshin jumsaǵan. Tergeý nátıjesinde Instagram jarnamasyna júzdegen mıllıon, qymbat múlik pen qumar oıyndarǵa mıllıondaǵan teńge shyǵyndalǵany anyqtalǵan. Qazir erli-zaıyptyǵa qatysty sot proesi júrip jatyr, dep habarlaıdy Skifnews.kz aqparat portaly.

Alaıda atalǵan aıyptaýlarǵa jaýap retinde Tolqyn Totaqanova Instagram jelisindegi paraqshasynda óz ustanymyn málimdep, ózin qorǵaýǵa tyrysty.

— Meni Perızat Qaıratpen salystyryp jatyr. Biraq men eshqashan baılyqta ómir súrgen joqpyn, páter de, qymbat kólik te alǵan emespin, – dep jazdy ol.

Onyń aıtýynsha, bul iske qatysty tergeý men sot bir jyldan astam ýaqyttan beri júrip jatyr jáne ázirge onyń kinási dáleldenbegen.

— Qazir bul iste jańa rezonans jasap, sotqa qysym kórsetý áreketi júrip jatyr, – dedi bloger.

Tolqyn Totaqanova sonymen qatar ózin birneshe jyldan beri qysym men qorqytýǵa ushyraǵanyn aıtyp otyr. Ol balasyn qutqarý úshin jeke tulǵalardan joǵary paıyzben qaryz alyp, ósimmen birge 700 mıllıon teńgeden astam qarajatty qaıtarýǵa májbúr bolǵanyn jetkizdi.

— Men bes jyldan beri shantaj, qorqytý men ólim qaýpimen ómir súrip kelemin. Búginde men resmı túrde jábirlenýshi retinde tanyldym. Bul – men úshin ádilet izdeýdiń jalǵyz joly, – dep málimdedi ol.

Tolqyn Totaqanovanyń bul jazbalary qoǵamda qyzý talqyǵa tústi. Biri ony qoldasa, endi biri kúmánmen qarap otyr. Bul jaǵdaı qaıyrymdylyq salasyndaǵy ashyqtyq pen senimdi basqarýdyń mańyzyn taǵy da aldyńǵy qatarǵa shyǵardy.