جاڭالىقتار
«مەنى ولتىرگەلى جاتىر»: اقتوبەلىك ايەلدىڭ قوڭىراۋىن جاۋاپسىز قالدىرعان 112 ديسپەتچەرىنىڭ جازاسى جەڭىلدەتىلدى
سۋرەت: اشىق دەرەككوزدەردەن
اقتوبەلىك كەلىنشەكتىڭ قوڭىراۋىن جاۋاپسىز قالدىرعان ديسپەتچەردىڭ جازاسىن اقتوبە وبلىستىق سوتى جەڭىلدەتتى. ول 2 جىلعا باس بوستاندىعىنان ايىرىلعان بولاتىن, دەپ حابارلايدى qandastar.kz KYN.KZ اقپارات اگەنتتىگىنە سىلتەمە جاساپ.
اپپەللياتسيالىق سوت توتەنشە جاعدايلار قىزمەتىنىڭ جەدەل ديسپەتچەرى ءادىل قاليدوللانىڭ ءىسىن 21 قازاندا قىركۇيەكتە شىعارىلعان ۇكىمىن قايتا قارادى. ناتيجەسىندە ەكى جىل باس بوستاندىعىنان ايىرۋ جازاسى ەكى جىلعا باس بوستاندىعىنان شەكتەۋگە اۋىستىرىلدى.
ۇكىمدى وزگەرتۋ تۋرالى شەشىم قانداي قابىلدانعانىن وبلىستىق سوت ناقتىلاعان جوق.
ەسكە سالساق, 9 ماۋسىمدا ساعات 12:18-دە قۇتقارۋ قىزمەتىنە 55 جاستاعى كلارا سۇلتانباەۆا قوڭىراۋ شالىپ, ءوزىن الدەكمنىڭ ولتىرگەلى جاتقانىن ايتقان. الايدا قوڭىراۋدى قابىلداعان قۇتقارۋ قىزمەتىنىڭ ديسپەتچەرى ءادىل كاليدوللا سالعىرتتىق تانىتىپ, مەكەن-جايىن ناقتىلاۋمەن شەكتەلگەن. ايەل سول كۇنى Toyota Camry اۆتوكولىگىن ساتۋعا شىققان. ول «ولار مەنى ولتىرەدى!» دەپ قاتتى ايقايلاعان. بىراق ديسپەتچەر كومەك جىبەرمەگەن. سالدارىنان كلارا سۇلتانباەۆا قاسكويلەر قولىنان قازا تاپقان.
