“Meni óltirip jatyr”: Aqtóbede kómek suraǵan áıeldiń qońyraýyn jaýapsyz qaldyrǵan 112 qyzmetkeri sottaldy

Foto: depositphotos.com

Aqtóbede ózin óltirip jatqanyn aıtyp kómek suraǵan soqqan áıeldiń qońyraýyn jaýapsyz qaldyrǵan 112 qyzmetkeri sottaldy. Bul týraly Stan.kz aqparat agenttigi habarlaıdy.

Aqtóbe qalalyq sotynda “salǵyrttyq” babymen aıyptalǵan 112 qyzmetkerine qatysty is qaraldy. Qyzmetker “meni óltirip jatyr” degen qońyraýdy qabyldaǵanymen eshqandaı áreket etpegen. Tıisti oryndarǵa habarlamaǵan.

Sot jábirlenýshi ókiliniń sottalýshydan 300 myń teńge kólemindegi materıaldyq jáne 5 mln teńge kólemindegi moraldyq shyǵyndardy óndirý týraly talabyn qanaǵatandyrmady.

“Ádil Qalıdolla qylmystyq quqyqbuzýshylyq jasaǵany úshin kináli dep tanylsyn. Oǵan memlekettik qyzmette jáne quqyq qorǵaý organdarynda laýazymdardy atqarý quqyǵynan 3 jylǵa aıyra otyryp, 2 jyl merzimge bas bostandyǵynan aıyrý jazasy taǵaıyndalsyn. Jábirlenýshiniń materıaldyq, moraldyq zııandy óndirý týraly azamattyq talap aryzy qaraýsyz qaldyrylsyn”, – delingen sot úkiminde.

Sonymen qatar sot Aqtóbe oblysynyń tótenshe jaǵdaılar departamentiniń basshysyna da jeke qaýly shyǵardy. TJ qyzmetkeriniń salǵyrttyǵyna baılanysty zańbuzýshylyqqa nazar aýdarýdy, olardyń aldyn alý maqsatynda jumystardy kúsheıtýdi tapsyrdy.

Sot barysynda fılologııalyq saraptamaǵa erekshe nazar aýdaryldy. Sottyń málimetinshe, jábirlenýshiden kelip túsken habarlamada rasynda da óltirip jatqany jáne densaýlyǵyna qaýip tónip turǵany sózderdiń maǵynasymen dáleldengen.

Is materıaldaryna súıensek, oqıǵa 2024 jyly 9 maýsym kúni saǵat 12:18 ýaqytynda tirkeldi.

Aqtóbe oblysynyń Tótenshe jaǵdaılar departamentiniń Daǵdarys jaǵdaılary basqarmasynyń jedel kezekshisiniń kómekshisi qońyraýdy qabyldaǵan. Biraq qońyraýdy elemeı, ishki ister organdarynyń jasaqtaryn qylmys ornyna jumyldyrýǵa baǵyttalǵan shuǵyl áreketter jasamaǵany aıtylady.

Eske salsaq, buǵan deıin Aqtóbede ólim aldynda kómek surap, qońyraý shalǵan áıelge dıspetcher mán bermegeni týraly jazǵan edik.