جاڭالىقتار
مەشىتتە ادامدارعا شابۋىل جاسالىپ, 9 ادام قازا تاپتى
قۇرباي ايتتا مەشىتتە ادامدارعا شابۋىل جاسالىپ, 9 ادام قازا تاپتى, دەپ حابارلايدى Qandastar.kz اقپارات پورتالى Mareb Press-كە سىلتەمە جاساپ.
يەمەندە مەشىتتەگى شابۋىلدان 9 ادام قازا تاپتى. وقيعا يەمەننىڭ ەل-بەيدا پروۆينتسياسىندا بولعان.
قۇربان ايت (يد-ال-ادحا) مەيرامىندا, كەشكى ناماز كەزىندە بەلگىسىز ەر ادام مەشىتتەگى جاماعاتقا شابۋىل جاساعان.
بەلگىلى بولعانداي, قاسكوي ادامدار كوپ جينالعان جەرگە گراناتا لاقتىرىپ, ارتىنشا ناماز وقىپ تۇرعان جاماعاتقا وق جاۋدىرعان. شابۋىل سالدارىنان 9 ادام قازا تاۋىپ, تاعى 12 ادام جاراقات الدى. زارداپ شەككەندەردىڭ قاتارىندا 12 جاستاعى بالا دا بار.
كۋاگەرلەردىڭ ايتۋىنشا, مەشىت ىشىندە ۇرەي مەن دۇربەلەڭ بولعان. ادامدار باعانالاردىڭ ارتىنا تىعىلىپ, وقتان جاسىرىنىپ, كەيبىرى كوشەگە قاشىپ شىعىپ امان قالۋعا تىرىسقان.
جەرگىلىكتى باق-تىڭ حابارلاۋىنشا, كۇدىكتى شابۋىل جاساعاننان كەيىن ءبىر جارىم ساعاتتان سوڭ ۇستالعان. الدىن الا اقپارات بويىنشا, ونىڭ پسيحيكالىق اۋىتقۋى بولۋى مۇمكىن دەگەن جورامال بار. قازىر تەرگەۋ جۇرگىزىلۋدە, شابۋىلدىڭ سەبەپتەرى مەن موتيۆتەرى انىقتالىپ جاتىر.
ادامدار مەشىتكە وتباسىلارىمەن بىرگە كەلىپ, يسلامداعى ەڭ قاسيەتتى مەيرامداردىڭ ءبىرىن اتاپ وتپەك بولدى. بۇل كۇن بەيبىتشىلىك, دۇعا جانە بىرىگۋدىڭ كۇنى بولۋى كەرەك ەدى. الايدا ول قورقىنىش پەن قاسىرەتكە اينالدى, – دەپ جازۋدا جەرگىلىكتى باسىلىمدار.
