«مەشىتتە «وحراننيك» بولۋدان شارشادىم»: بۇرىنعى مولدا يمامدىق قىزمەت تۋرالى بار شىندىقتى ايتتى

فوتو: Stan.kz / قانات تالعات ۇلى

قازاقستاندىق بۇرىنعى نايب يمام قانات تالعات ۇلى مەشىتتەگى قىزمەتى كەزىندە ماردىمسىز ايلىق العان. جالاقىسى وتباسىن تولىققاندى اسىرۋعا جەتپەگەندىكتەن, جيھاز سالاسىنا كەتكەن. ول Stan.kz تىلشىسىنە ەلىمىزدەگى يمامداردىڭ مارتەبەسى تومەندەگەنىن جانە ءدىني جورالعىلاردان ازدى-كەم تابىس العانىن ايتتى.

بۇرىنعى نايب يمام قانات تالعات ۇلى مەشىتتە قانشا ايلىق العانىن جانە ءدىني قىزمەتتىڭ جۇيەسىن ايتىپ بەردى.

«اۋەلى, مەشىتتىڭ جۇيەسىن ايتىپ وتەيىك. مەشىتتە جاشىك بولادى. ەلدىڭ ءبارى جۇما نامازعا, قۇربان ايت نەمەسە باسقا ءدىني جورالعىلار جاساعان كەزدە جاشىككە اقشا تاستاپ وتىرادى. سول تاستاعان اقشادان, ەڭ ءبىرىنشى, مەشىتتىڭ سۋ مەن جارىعىنا, جىلۋ مەن كەرەك-جاراقتارىنا وتەلەدى. بۇدان كەيىن ول جەردە قانشا قىزمەتكەر بولسا, مارزىمايتىن 50-60 مىڭ تەڭگە كولەمىندە قارجى بەرىلەدى. مەنىڭ سوڭعى جۇمىس ىستەگەن مەشىتىمدە ايىنا 40 مىڭ تەڭگە شىعاتىن. بۇل قارجى مەشىتتىڭ ەشنارسەسىنە جەتپەيتىن. مىسالى, 25 پەن 30 مىڭ تەڭگەنى جارىققا تولەيتىن ەدىم. قالعان سومانى حالىق شاقىراتىن قۇدايى تاماق, جانازا سەكىلدى جەرلەردەن الاتىنبىز. وسى نارسەدەن كۇن كوردىك. بىلايشا ايتقاندا, جۇمىس ىستەدىم, قۇدايى تاماققا باردىم, قىزمەت ەتتىم دەگەننىڭ وزىندە 100 مىڭ تەڭگەدەن اسپايتىن. بۇعان كۇن كورۋ مۇمكىن ەمەس. سەبەبى بالا-شاعا ءوسىپ كەلە جاتىر, ولاردىڭ بالاباقشاسى بار. پاتەراقىنى دا تولەۋگە جەتپەيتىن ەدى. سودان كەيىن امالسىزدان يمامدىق قىزمەتتەن كەتىپ, قازىر جيھاز سالاسىندا ۇستا بولىپ جۇمىس ىستەپ ءجۇرمىن. بۇرىن 100 مىڭ تەڭگە كولەمىندە ايلىق السام, بۇگىندە 400 مىڭ مەن 500 مىڭ تەڭگە ارالاعىندا ناپاقامىزدى تاۋىپ جاتىرمىز», – دەپ اعىنان جارىلدى قانات تالعات ۇلى.