«Meshitte «ohrannık» bolýdan sharshadym»: Burynǵy molda ımamdyq qyzmet týraly bar shyndyqty aıtty

Foto: Stan.kz / Qanat Talǵatuly

Qazaqstandyq burynǵy naıb ımam Qanat Talǵatuly meshittegi qyzmeti kezinde mardymsyz aılyq alǵan. Jalaqysy otbasyn tolyqqandy asyrýǵa jetpegendikten, jıhaz salasyna ketken. Ol Stan.kz tilshisine elimizdegi ımamdardyń mártebesi tómendegenin jáne dinı joralǵylardan azdy-kem tabys alǵanyn aıtty.

Burynǵy naıb ımam Qanat Talǵatuly meshitte qansha aılyq alǵanyn jáne dinı qyzmettiń júıesin aıtyp berdi.

«Áýeli, meshittiń júıesin aıtyp óteıik. Meshitte jáshik bolady. Eldiń bári juma namazǵa, Qurban aıt nemese basqa dinı joralǵylar jasaǵan kezde jáshikke aqsha tastap otyrady. Sol tastaǵan aqshadan, eń birinshi, meshittiń sý men jaryǵyna, jylý men kerek-jaraqtaryna óteledi. Budan keıin ol jerde qansha qyzmetker bolsa, marzymaıtyn 50-60 myń teńge kóleminde qarjy beriledi. Meniń sońǵy jumys istegen meshitimde aıyna 40 myń teńge shyǵatyn. Bul qarjy meshittiń eshnársesine jetpeıtin. Mysaly, 25 pen 30 myń teńgeni jaryqqa tóleıtin edim. Qalǵan somany halyq shaqyratyn qudaıy tamaq, janaza sekildi jerlerden alatynbyz. Osy nárseden kún kórdik. Bylaısha aıtqanda, jumys istedim, qudaıy tamaqqa bardym, qyzmet ettim degenniń ózinde 100 myń teńgeden aspaıtyn. Buǵan kún kórý múmkin emes. Sebebi bala-shaǵa ósip kele jatyr, olardyń balabaqshasy bar. Páteraqyny da tóleýge jetpeıtin edi. Sodan keıin amalsyzdan ımamdyq qyzmetten ketip, qazir jıhaz salasynda usta bolyp jumys istep júrmin. Buryn 100 myń teńge kóleminde aılyq alsam, búginde 400 myń men 500 myń teńge aralaǵynda nápaqamyzdy taýyp jatyrmyz», – dep aǵynan jaryldy Qanat Talǵatuly.