مەتسەنات ءوز قارجىسىنا شەرزات پولاتتىڭ وتباسىنا ءۇي سالىپ بەرمەك

فوتو:© ايدانا دايىروۆا

قازاقستاندىق قوعام بەلسەندىسى ايتبەك امانگەلدى تالعاردا قايعىلى جاعدايدا قازا تاپقان 16 جاستاعى شەرزات پولاتتىڭ وتباسىنا مەتسەناتتىڭ قاراجاتىنا ءۇي سالىناتىنىن ايتتى, دەپ حابارلايدى qandastar.kz

ايتبەك امانگەلدىنىڭ پاراقشاسىندا شەرزاتتىڭ اكەسى قارجاۋباي نۇرىموۆتىڭ وتباسىنا ارنالعان ءۇي تەك مەتسەناتتىڭ قاراجاتىنا سالىناتىنى ايتىلعان. ايتبەك امانگەلدى پىكىرلەردە ءارتۇرلى ەسەپشوتتار ارقىلى قاراجات جيناۋ تۋرالى اقپارات تارالىپ جاتقاندىقتان, الاياقتىق قاۋپى بار ەكەنىن ەسكەرتكەن,  دەپ جازادى Stan.kz.

“جينالعان قاراجاتقا قاتىستى قوسىمشا تۇسىنىكتەمەلەر:

قارجاۋبايدىڭ وتباسى ءۇشىن ءۇي مەتسەناتتىڭ قاراجاتىنا ساتىپ الىنادى, ال پەريزاتتىڭ جيناعان اقشاسى بۇل ماقساتقا جۇمسالمايدى.

ءبىزدىڭ بۇل جيناققا قاتىسىمىز جوق بولعاندىقتان, ونىڭ رەكۆيزيتتەرىن بىلمەيمىز.

قازىرگى پىكىرلەردە ءارتۇرلى رەكۆيزيتتەر پايدا بولىپ, الاياقتىق ارەكەتتەرگە جەم بولىپ قالماڭىزدار. رەكۆيزيتتەردى ناقتىلاۋ ءۇشىن اقپارتاتتى تىكەلەي پەريزاتقا حابارلاسىپ الۋعا بولادى. بۇل جيناقتىڭ ماقساتى بىزگە بەلگىسىز.

پەريزات ەشقانداي قىلمىستىق ءىس بويىنشا جابىرلەنۋشى بولىپ سانالمايدى جانە ول ءبىزدىڭ سەنىم ءبىلدىرۋشىمىز نەمەسە قامقورلىعىمىزداعى تۇلعا ەمەس. ونىڭ ءوز ادۆوكاتتارى جانە قوعامدىق قايراتكەرلەرى بار. وسى جيناقتى بىزبەن جانە قارجاۋمەن بايلانىستىرماۋلارىڭىزدى سۇرايمىز», – دەپ جازدى ايتبەك امانگەلدى.

ەسكە سالايىق, 4 قازانعا قاراعان ءتۇنى تالعاردا 16 جاستاعى شەرزات پولات قازا تاپقان. ونىڭ ءولىمى قوعامدا ۇلكەن نارازىلىق تۋدىردى. مارقۇمنىڭ اكەسى تۋىستارىمەن جانە جەرگىلىكتى تۇرعىندارمەن بىرگە ءادىل تەرگەۋ جۇرگىزۋدى تالاپ ەتىپ, نارازىلىق ۇيىمداستىردى. بىرنەشە كۇننەن كەيىن, 12 قازانعا قاراعان ءتۇنى نۇرىموۆتار وتباسىنىڭ ءۇيى تولىعىمەن ورتەنىپ كەتتى. باس پروكۋراتۋرا ءورتتىڭ قاساقانا جاسالعانىن مالىمدەدى. جەرگىلىكتى بيلىك وتباسىنا ۋاقىتشا باسپانا مەن تاۋلىك بويى كۇزەت بەردى. سونداي-اق اكىمدىك ءۇيدى قالپىنا كەلتىرۋگە ۋادە بەردى.

وقيعالاردى تەرگەۋ كەزىندە ىشكى ىستەر ءمينيسترىنىڭ ءبىرىنشى ورىنباسارى باۋىرجان الەنوۆ پەن الماتى وبلىسىنىڭ پروكۋرورى بەرىك اداموۆ 12 قازاندا كىنالىلەردى انىقتاۋ بويىنشا شارالار تۋرالى مالىمدەدى. قوعامدىق ءتارتىپتى ساقتاۋ ءۇشىن تالعارعا ۇلتتىق ۇلان كۇشتەرى جۇمىلدىرىلدى.

9 جەلتوقساندا تالعاردىڭ شەتىندە شەرزات پولاتتىڭ جانىندا بولىپ, قاقتىعىس كەزىندە قازا تاپقان ءجاسوسپىرىمنىڭ اكەسىنىڭ جانىندا جۇرگەن ونىڭ اعاسىنىڭ دەنەسى تابىلعانى بەلگىلى بولدى. پوليتسيا مالىمەتىنشە, ەر ادام وزىنە قول جۇمساعان.