الەم جاڭالىقتارى
ميحايل سااكاشۆيلي تاعى ءبىر تاعىلدى
فوتو: ريا نوۆوستي
تبيليسي سوتى گرۋزيانىڭ بۇرىنعى پرەزيدەنتى ميحايل سااكاشۆيليدى 2021 جىلى شەكارانى زاڭسىز كەسىپ وتكەنى ءۇشىن ءتورت جارىم جىلعا ەركىندىگىنەن ايىرۋ تۋرالى ۇكىم شىعاردى, دەپ حابارلادى qandastar.kz
جەرگىلىكتى باق-تىڭ حابارلاۋىنشا, سااكاشۆيلي سوت وتىرىسىنا قاتىسپاعان.
2021 جىلعى 1 قازاندا ميحايل سااكاشۆيلي گرۋزياعا, ياعني سودان 8 جىل بۇرىن كەتكەن ەلگە ورالدى. سول كەزدە گرۋزين قۇقىق قورعاۋ ورگاندارى بۇرىنعى پرەزيدەنتتى ۇستاپ الىپ, وعان شەكارانى زاڭسىز كەسىپ ءوتتى دەگەن ايىپ تاققان.
گرۋزيانىڭ تەرگەۋ ورگاندارىنىڭ دەرەگى بويىنشا, سااكاشۆيلي ۋكراينانىڭ چەرنومورسك قالاسىنان گرۋزيانىڭ پوتي پورتىنا بەت العان «ۆيلنيۋس» دەپ اتالاتىن كەمەدە بولعان. 2021 جىلعى 29 قىركۇيەككە قاراعان ءتۇنى كەمە پورتقا كىرگەن سوڭ, ودان ءسۇت ونىمدەرى تيەلگەن تىركەمەسى بار ترەيلەر شىققان, سااكاشۆيلي سونىڭ ىشىندە بولعان.
وتكەن اپتادا تبيليسي سوتى گرۋزيانىڭ بۇرىنعى پرەزيدەنتىن 2009-2013 جىلدار ارالىعىندا «بيۋدجەت قاراجاتىن تالان-تاراجعا سالعانى ءۇشىن ايىپتى» دەپ تانىپ, توعىز جىلعا بوستاندىعىنان ايىرۋ تۋرالى ۇكىم شىعاردى. سااكاشۆيليدىڭ ء«بىرتۇتاس ۇلتتىق قوزعالىس» پارتياسى ۇكىمنىڭ ساياسي استارى بار دەپ باعا بەردى.
سااكاشۆيلي قازىر «قىزمەت وكىلەتىن اسىرا پايدالانعانى» ءۇشىن سوت كەسكەن التى جىلدىق جازا مەرزىمىن وتەپ جاتىر. قازىر 2007 جىلعى 7 قاراشادا بولعان وقيعالارعا بايلانىستى ونىڭ ۇستىنەن قوزعالعان ءىس بويىنشا تەرگەۋ ءجۇرىپ جاتىر. ول كەزدە سااكاشۆيلي گرۋزيا پرەزيدەنتى بولاتىن, بيلىك وپپوزيتسيا ميتينگىسىن كۇشپەن تارقاتقان ەدى. قاماۋدا بولعان كەزىندە بۇرىنعى پرەزيدەنت دەنساۋلىعى ناشارلاعانىن ايتىپ, بىرنەشە رەت اشتىق جاريالاعان.
