ميككي ماۋس بەينەلەنگەن كۇرتەشە كيگەنى ءۇشىن تىڭشى دەگەن كۇدىككە ءىلىندى

9 مامىردا ەكاتەرينبۋرگتە پوليتسەيلەر 53 جاستاعى ليۋدميلا ەسىمدى قالا تۇرعىنىن «ەكسترەميستىك» كۇرتەشەسى ءۇشىن ۇستاپ, بولىمشەگە الىپ كەتكەن. ونىڭ كيىمىندە ميككي ماۋس جانە كوك, سارى جانە سۇر تۇستەن تۇراتىن ءۇش كولدەنەڭ جولاق بەينەلەنگەن. ايەل شەتەلدىك بارلاۋعا جۇمىس ىستەيدى دەگەن كۇدىككە ىلىنگەن. بۇل تۋرالى qandastar.kz سايتى E1.RU جەلىلىك باسىلىمىنا سىلتەمە جاساپ حابارلايدى.

بۇل جايتقا ليۋدميلانىڭ قىزى اناستاسيا كۋا بولعان. ونىڭ ايتۋىنشا, اناسى جۇرەك تالماسىنان جاقىندا وڭالعان. قىز پوليتسەيلەرمەن بولعان اڭگىمەنى ۆيدەوعا ءتۇسىرىپ العان.

«اناڭ رەسەي فەدەراتسياسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 20.3-بابىن (ناتسيستىك اتريبۋتيكانى نەمەسە بەلگىلەردى ناسيحاتتاۋ نەمەسە كوپشىلىككە كورسەتۋ) بۇزدى دەگەن كۇدىكپەن ۇستالدى.ەكسترەميزم بەلگىلەرى بار», — دەيدى پوليتسيا قىزمەتكەرى.

ال ۆيدەوعا ءتۇسىرىپ تۇرعان ليۋدميلانىڭ قىزى اناستاسيا قازاقستاننان كوشىپ بارعانىن, قازاقستاننىڭ تۋىندا دا سارى جانە كوك تۇستەر بار ەكەنىن, ولاردى ەش سەبەپسىز ۇستاعانىن ايتادى.

«ونداي ەشنارسە جوق! مەن سۋرەتشىمىن. سارى مەن كوك ءتۇس بولسا, بولدى ما? ءبىز قازاقستاننان كەلدىك, وسىندا ازاماتتىق الدىق. قازاقستاننىڭ تۋىندا دا كوك جانە سارى تۇستەر بار», — دەيدى اناستاسيا.

اقىرى قۇقىق قورعاۋ ورگاندارىنىڭ قىزمەتكەرلەرى ليۋدميلا مەن قىزىن بولىمشەگە الىپ بارىپ, تۇسىنىكتەمە جازدىرعان.

ء“بىزدى بولىمشەگە الىپ باردى. ونداعى ادامدار الداقايدا ادەكۆاتتى ەكەن, ءبىر تۇسىنبەستىك بولعانىن ءتۇسىندى. انام ەكەۋمىزدەن تۇسىنىكتەمە الىپ, كۇرتەشەنى تاركىلەدى. حاتتاما تولتىرعان جوق. كۇرتەشەنى 10 كۇننەن كەيىن الىپ كەتۋگە بولاتىنىن ايتتى. ازىرگە سوتقا بەرۋدى ويلاپ وتىرعان جوقپىز, ءبىزدىڭ ۇستىمىزدەن دە ءىس قوزعالماعان سياقتى. سول كۇننەن كەيىن ورگاننان ەشكىم حابارلاسقان جوق, ءبىز كۇتىپ ءجۇرمىز. باستىسى, ءبارى قالپىنا كەلىپ, كۇرتەشەنى قايتارسا بولدى”, – دەيدى ليۋدميلانىڭ قىزى اناستاسيا.

جەلى قولدانۋشىلاردىڭ باسىم بولىگى پوليتسەيلەر كۇرتەشەدەگى سارى جانە كوك جولاققا بولا ۇستاپ الىپ كەتكەنىنە سەنبەگەن. ال كەيبىرەۋلەر ايەلدەر قولىنا پلاكات (مولبەرتتى پلاكات دەپ قالعان) ۇستاپ شىققان دەپ ويلاعان.

“ول پورترەت ۇلگىلەرى مەن “15 مينۋتتا دايىن بولاتىن پورترەت” دەگەن جازۋ بولاتىن. مەن ادامداردىڭ سۋرەتىن سالىپ وتىرعانمىن, ال الگى پلانشەت جۇمىسىمنىڭ ۇلگىسىن كورسەتۋگە ارنالعان بولاتىن. مەن سۋرەتشىمىن”, – دەيدى اناستاسيا.

ىشكى ىستەر مينيسترلىگىنىڭ ەكاتەرينبۋرگ بويىنشا باسقارماسى وكىلدەرى بۇل جايتقا پىكىر بىلدىرۋدەن باس تارتقان.