Миллиондаған Ұлттық қор ақшасын оңды-солды шашқан экс-шенеунік сотталды

Павлодар аудандық прокуратурасы тексеру барысында Павлодар ауданындағы нақты сектор экономика бөлімінің басшысының лауазымын асыра пайдалану фактісін анықтады. Ауыр қылмыс әлеуметтік нысан салу кезінде жасалған.

«Ауыл — ел бесігі» мемлекеттік бағдарламасы аясында Ұлттық қордан бөлінген қаражат есебінен Кемеңгер ауылында спорт-сауықтыру кешені салынған, оның құны — 382 млн теңге. Бюджеттік қаражаттың заңсыз жұмсалуын тексеру барысында мердігерге орындалмаған жұмыстардың көлемі үшін 158 млн теңге төленгені анықталды». Павлодар облысының прокуратурасы

Аудан прокуратурасы лауазымды тұлғаның қызметтік өкілеттігін асыра пайдалану фактісі бойынша материалдарды Қылмыстық кодекстің 361-бабы бойынша ЕРДР-ға тіркеді, алдын ала тергеуді сыбайлас жемқорлыққа қарсы департамент жүргізді.

«Павлодар облысының аралық сотының үкімімен бұрынғы нақты сектор экономика бөлімінің басшысы 3 жылға бас бостандығынан айырылып, мемлекеттік қызметте лауазым атқару құқығынан өмір бойына айырылды». Павлодар облысының прокуратурасы

Сот актісі заңды күшіне енген жоқ.

Бұған дейін ел азаматтарының бірі БЖЗҚ-дағы қаражатты шешіп беру бойынша алаяқтық схемасын ұйымдастырып, тұтылғаны хабарланған.