Mıllıondaǵan Ulttyq qor aqshasyn ońdy-soldy shashqan eks-sheneýnik sottaldy

Pavlodar aýdandyq prokýratýrasy tekserý barysynda Pavlodar aýdanyndaǵy naqty sektor ekonomıka bóliminiń basshysynyń laýazymyn asyra paıdalaný faktisin anyqtady. Aýyr qylmys áleýmettik nysan salý kezinde jasalǵan.

«Aýyl — el besigi» memlekettik baǵdarlamasy aıasynda Ulttyq qordan bólingen qarajat esebinen Kemeńger aýylynda sport-saýyqtyrý kesheni salynǵan, onyń quny — 382 mln teńge. Bıýdjettik qarajattyń zańsyz jumsalýyn tekserý barysynda merdigerge oryndalmaǵan jumystardyń kólemi úshin 158 mln teńge tólengeni anyqtaldy». Pavlodar oblysynyń prokýratýrasy

Aýdan prokýratýrasy laýazymdy tulǵanyń qyzmettik ókilettigin asyra paıdalaný faktisi boıynsha materıaldardy Qylmystyq kodekstiń 361-baby boıynsha ERDR-ǵa tirkedi, aldyn ala tergeýdi sybaılas jemqorlyqqa qarsy departament júrgizdi.

«Pavlodar oblysynyń aralyq sotynyń úkimimen burynǵy naqty sektor ekonomıka bóliminiń basshysy 3 jylǵa bas bostandyǵynan aıyrylyp, memlekettik qyzmette laýazym atqarý quqyǵynan ómir boıyna aıyryldy». Pavlodar oblysynyń prokýratýrasy

Sot aktisi zańdy kúshine engen joq.

Buǵan deıin el azamattarynyń biri BJZQ-daǵy qarajatty sheship berý boıynsha alaıaqtyq shemasyn uıymdastyryp, tutylǵany habarlanǵan.