Mınıstr: Air Astana Bıbigúl Tólegenovaǵa qurmet kórsetý kerek edi

Foto: ashyq derekkóz

Qaznette Air Astana áýe kompanııasy qyzmetkeriniń  halyq ártisi Bıbigúl Tólegenovaǵa kórsetken dórekilik áreketi kópshiliktiń arasynda rezonans týdyrdy, dep habarlaıdy Qandastar.kz.

Osyǵan baılanysty QR Mádenıet jáne aqparat mınıstri Aıda Balaeva  óziniń Facebook paraqshasynda pikir qaldyrdy.

Qurmetti dostar!
Qazaqstannyń jáne KSRO-nyń halyq ártisi, aty ańyzǵa aınalǵan ánshi Bıbigúl Tólegenovny Air Astana áýe kompanııasynyń bortyna otyrǵyzý kezinde bolǵan óte yńǵaısyz jaǵdaı meni de qatty alańdatty.
Áýe kompanııasy bul másele qatysty túsinikteme berip, áýe qaýipsizdiginiń halyqaralyq erejeleri eske saldy. Árıne, ushaqtyń jáne jolaýshylardyń qaýipsizdigin qamtamasyz etýge arnalǵan erejeler qatań saqtalýǵa tıis.
Degenmen, áýe kompanııasymen pikir qaıshylyǵyna barmaı-aq, oryn alǵan jaǵdaıǵa baılanysty óz oıymdy bildirgim keledi. Naqtyraq aıtqanda, áýe kompanııasy men onyń qyzmetkerleri ishki nusqaýlyqtardan bólek, qarapaıym etıkany, adamı qarym-qatynasty saqtap, óz klıentterine qurmetpen qaraýy kerek dep esepteımin. Ásirese, jasy úlken jolaýshylarǵa, Otan aldynda aıryqsha eńbegi bar adamdarǵa erekshe qurmet kórsetilýge tıis. О́ıtkeni aǵa býynǵa qurmet – tárbıe men ishki mádenıet máselesi.
Al qazaq óneriniń bulbuly, óner maıtalmany Bıbigúl Ahmetqyzyna zor densaýlyq, uzaq ómir men sarqylmas kúsh-jiger tileımin! – dedi mınıstr.

Osy oqıǵaǵa oraı, Air Astana áýe kompanııasynyń prezıdenti Pıter Fosterge joldanǵan úndeý hat jarııalandy. Úndeýde kompanııa qyzmetkeriniń 94 jastaǵy halyq ártisi Bıbigúl Tólegenovaǵa qatysty dórekilik kórsetilgenin jáne keshirim suraý talaby bar.