مينيستر الداعى ۋاقىتتا نەنىڭ ارزاندايتىنىن ايتتى

فوتو: اشىق دەرەككوز

اۋىل شارۋاشىلىعى ءمينيسترى ايداربەك ساپاروۆ ۇكىمەت وتىرىسىنان كەيىن ەلىمىزدى 2025 جىلى ارزانداتىلعان باعامەن كارتوپپەن قامتاماسىز ەتۋگە ۋادە بەردى, دەپ حابارلايدى qandastar.kz

ءمينيستردىڭ ايتۋىنشا, بىلتىر كەتكەن كەمشىلىكتەر سارالانىپ, ءتيىستى جۇمىستار اتقارىلعان. كارتوپ تاپشىلىعىنىڭ باستى سەبەبى – وزبەكستان تاراپىنان بولعان جوعارى سۇرانىس. سوڭعى ون جىلدا مۇنداي كولەمدە ەكسپورت تىركەلمەگەن – شامامەن 600 مىڭ توننا ءونىم سىرتقا جونەلتىلگەن. ال شەتەلدەن يمپورتتالعان كولەم نەبارى 60 مىڭ توننانى قۇراپ, ەكسپورتتىڭ 10%-ىنا عانا تەڭ بولعان.

«بيىل كارتوپ ەگىس كولەمى نەگىزىنەن شارۋا قوجالىقتارىندا ەمەس, ۇيىمداستىرىلعان اگرووندىرىستىك قۇرىلىمداردا ۇلعايتىلادى. سوندىقتان ىشكى نارىقتى جەتكىلىكتى مولشەردە قامتاماسىز ەتەمىز دەپ سەنەمىن. باعاسى دا ءسال تومەندەيدى», – دەدى ايداربەك ساپاروۆ.

مينيستر بىلتىر قازاقستاندا 2,6 ملن توننا كارتوپ جينالعانىن ەسكە سالدى, ال ەلدىڭ ىشكى قاجەتتىلىگى 2 ملن توننانى قۇراعان. الايدا كورشى وزبەكستاننان كەلگەن جوعارى سۇرانىس باعانىڭ شارىقتاۋىنا اسەر ەتكەن.