Bilim
Mınıstr ata-analarmen kezdesýde ne nársege mańyz berdi?
Foto: ashyq derekkóz
Oqý-aǵartý mınıstri ata-analarmen kezdesýde tárbıege basymdyq berdi, dep jazdy qandastar.kz
Ǵanı Beısembaev ata-analar komıtetiniń ókilderine arnalǵan «Balalardyń ál-aýqaty men qaýipsizdigi: ata-ana men mekteptiń birlesken jaýapkershiligi» semınar-trenıngine qatysty. Oǵan elimizdiń barlyq óńirinen 500-ge jýyq ata-ana jınaldy.
Mınıstr ata-analardy balalardyń tárbıesine erekshe kóńil bólýge shaqyrdy jáne ata-ana men mekteptiń yntymaqtastyǵyn arttyrý, ata-analar komıtetteriniń rólin nyǵaıtýdyń mańyzdylyǵyna toqtaldy.
«Balalardy oqytý men tárbıeleý proesinde ortaq jaýapkershilik bolýy kerek – bul biz umtylýymyz kerek negizgi qundylyq. Ol eń aldymen ata-ananyń basty jaýapkershiliginde, memleket pen mektep tarapynan olarǵa qoldaý kórsetip, árbir balanyń jan-jaqty damýyna jaǵdaı jasaýda. Tárbıe otbasynan bastalatynyn este ustaǵan jón. Ata-ana ustazǵa degen qurmettiń úlgisin kórsetýi kerek, óıtkeni bala ata-anasynyń aınasy», – dedi Ǵanı Beısembaev.
Onyń aıtýynsha, balalardyń qaýipsizdigin qamtamasyz etý, quqyqtaryn qorǵaý, olardyń damýyna qolaıly jaǵdaı jasaý – memlekettik saıasattyń eń mańyzdy basymdyǵy. Bul baǵytta aýqymdy sharalar atqarylýda. Bes jylda elimizde 1 mln oqýshy ornyna arnalǵan 1 myńnan astam mektep ashyldy. Alǵash ret ótken jyldan bastap 1,7 mıllıonnan astam bastaýysh synyp oqýshylary men áleýmettik osal otbasylardan shyqqan balalar tegin tamaqpen qamtyldy.
«Memleket balalar úshin qaýipsiz jáne ergonomıkalyq bilim ortasyn qurýdy jalǵastyrýda. Bul rette Memleket basshysynyń bastamasymen qalalar men shalǵaıdaǵy aýyldardy da qamtıtyn «Jaıly mektep» Ulttyq jobasy iske asyrylýda. О́tken jyldan bastap barlyq bilim berý uıymdarynda «Birtutas tárbıe» baǵdarlamasy engizilip, onyń aıasynda balalardy tárbıeleýde ata-analardyń psıhologııalyq-pedagogıkalyq jáne áleýmettik quzyrettiligin arttyrýǵa, pozıtıvti ata-ana mádenıetin qalyptastyrýǵa baǵyttalǵan Ata-analardy pedagogıkalyq qoldaý ortalyqtary ashyldy», – dep atap ótti mınıstr.
Bul semınar-trenıng «Birtutas tárbıe» baǵdarlamasy aıasynda uıymdastyryldy. Tárbıe jumysy boıynsha negizgi tórt taqyrypqa bólingen dıskýssııalyq alańdar uıymdastyryldy. Sonymen qatar qazaqstandyq sýretshi Ańsaǵan Mustafanyń taqyryptyq kórmesi ótip, ata-analarǵa qazirgi zaman jaǵdaıynda balalarmen emoıonaldy baılanys ornatý tásilderi, janjaldardy eńserý jáne otbasy men mektepte senimdi atmosfera qurý boıynsha ádistemelik quraldar usynyldy.
