Mınıstr durys kúıge túsken dúnıeni qurtyp jatyr- sarapshy

Foto: Kýrsıvmedıa.kz

Oqý-aǵartý mınıstri Ǵanı Beısembaev májilis depýtaty Ashat Aımaǵambetov mınıstr qyzmetinde jasap ketken júıeni ózgertip jatyr. Bul týraly bilim salasyndaǵy ózekti problemalardy kóterip júrgen maman Aıatjan Ahmetjanov aıtty, – dep habarlaıdy qandastar.kz

Dalanews.kz buǵan deıin jazǵanyndaı,  Aıatjan Ahmetjanov Beısembaev qandaı ózgerister jasap jatqanyn aıtty.

«Aımaǵambetov oqýshyny qalanyń ishinen, bir óńirden toqsan úzilisinen basqa ýaqytta aýystyrmaý týraly norma qoıyp tastady. Bıyl ony Oqý aǵartý mınıstrligi alyp tastady. Ol ne úshin isteldi? Mysaly jekemenshik mektepter ár aıdyń 15-i memleketke oqýshylardyń tizimin ótkizedi. Al negizi jekemenshik mektepter qarapaıym mektepten oqýshyny ákelip, on kún tizimge qosyp, qaıtadan qaıtaryp jiberedi. Ony balanyń ata-anasy da bilmeı qalady. Osyndaı jemqorlyq faktileri týady. Tártipke kelip qalyp edik. Al biz tártipti aldyq ta, qaıtadan «bardak» boldy. Zańmen birinshi synypqa qabyldaýdy 31 shildemen aıaqtaıtyn etip tastady. Ony alyp 31 tamyzǵa qaıtadan syryp tastady.

Bul ne degen sóz? Jurt 31 shildege deıin qujatyn tapsyryp bitedi, tamyzda bir aı mektep dırektory oqýlyǵyn, kabnetin, muǵalimdi daıyndaıdy. Endi qalada tamyzdyń sońyna deıin dırektor ne bolatynyn bilmeı otyrady. Sosyn bala birinshi synypqa kelgende ne oqýlyq jetispeıdi, al artyq oqýlyq alyp qoısa memleket «qarjyny tıimdi paıdalanbadyń» dep qysady. Bul qoǵammen otyryp taldaıtyn taqyryp emes, sebebi túsinbeıdi. Ony dırektor bolǵan adam túsinedi.

Mınıstr durys kúıge túsken dúnıeni qurtyp jatsa qalaı durys baǵalaısyń? Muǵalimderdiń qaýymdastyǵy 1,5 jyl bylyǵyp turdy. Mysaly sarapshy bolǵyń keldi bola almaısyń, sebebi mınıstrlik daıyn emespiz dep otyrdy. Bylyǵyp jatyr. Mınıstr qaıda? Men Aımaǵambetovti maqtasam renjýi múmkin. Pıar úshin istedi deýi múmkin, isteı bersin, bastysy jumys istesin», – deıdi Aıtjan Ahmetjanov Kultobe arnasyna bergen suhbatynda.