مينيستر: ينكليۋزيۆتى ءبىلىم بەرۋدىڭ ساپاسىن ارتتىرۋ ءۇشىن زاڭناما جەتىلدىرىلۋدە

فوتو: مينيسترلىك پاراقشاسىنان

وقۋ-اعارتۋ ءمينيسترى عاني بەيسەمباەۆ الماتى قالاسىنا جۇمىس ساپارى بارىسىندا بىرقاتار ءبىلىم بەرۋ ۇيىمدارىن ارالاپ, پەداگوگيكالىق قاۋىمداستىقپەن, وقۋشىلارمەن, ءبىلىم سالاسىنىڭ ارداگەرلەرىمەن جانە اتا-انالار كوميتەتىنىڭ وكىلدەرىمەن كەزدەسۋ وتكىزدى, دەپ جازادى qandastar.kz

عاني بەيسەمباەۆ زاعيپتار مەن ناشار كورەتىن بالالارعا ارنالعان №4 ارنايى مەكتەپ ينتەرناتىندا جۋىردا عانا مەملەكەت باسشىسىنىڭ قولىنان «قازاقستاننىڭ ەڭبەك ەرى» مەملەكەتتىك ناگراداسىن العان ماتەماتيكا ءپانىنىڭ مۇعالىمى گۇلجانار نۇرپەيىسوۆانىڭ ساباعىنا ارنايى باس سۇعىپ, مۇعالىممەن, وقۋشىلارمەن سۇحباتتاستى. ۇستاز ميسسياسىنا ادال پەداگوگ ەرەكشە بالالارمەن جۇمىس جاساۋدى ءوز جۇرەك قالاۋىمەن تاڭداعان.  عاني بەيسەمباەۆ گۇلجانار نۇرپەيىسوۆا سىندى ۇستازداردىڭ ەلىمىزدىڭ ماقتانىشى ەكەنىن, ال ونىڭ كاسىبيلىگى مەن ءوز ىسىنە ادالدىعى كوپشىلىككە ۇلگى-ونەگە ەكەنىن ايتتى.

اتالعان مەكتەپ-ينتەرناتتا 236 ەرەكشە ءبىلىم بەرۋدى قاجەت ەتەتىن بالا ءبىلىم الادى. وقۋ پروتسەسى ولاردىڭ ەرەكشەلىگىن ەسكەرە وتىرىپ ۇيىمداستىرىلعان, مۇندا بالالاردىڭ ەرەكشەلىكتەرىنە قاراي بەيىمدەلگەن ادىستەمەلىك ماتەريالدار قولدانىلادى.

ەلىمىزدە 496 ارنايى ۇيىمدا ەرەكشە ءبىلىم بەرۋ قاجەتتىلىكتەرى بار بالالارمەن بارلىعى 9 مىڭ پەداگوگ جۇمىس جاسايدى. بالالاردى ارنايى بىلىممەن قامتۋ 84%-عا جەتتى. ايتا كەتۋ كەرەك, بيىلعى جىلدان باستاپ مۇگەدەكتىگى بار بالالار ءۇشىن كوللەدجگە ءتۇسۋ كۆوتاسى 1 پايىزدان 10 پايىزعا ۇلعايتىلدى.