مينيستر قازاقستاندىقتاردى جاڭا وقۋ جىلىنىڭ باستالۋىمەن قۇتتىقتادى

فوتو: اشىق دەرەككوز

ءبىلىم كۇنىنە وراي وقۋ-اعارتۋ ءمينيسترى عاني بەيسەمباەۆ ۇستازدار مەن اتا-انالاردى, وقۋشىلاردى قۇتتىقتادى,- دەپ حابارلايدى qandastar.kz

«قۇرمەتتى ارىپتەستەر! قادىرلى ۇستازدار, اتا-انالار مەن وقۋشىلار! بۇگىن قازاقستاننىڭ تۇكپىر-تۇكپىرىندەگى ءبىلىم وردالارى ءوز ەسىگىن ايقارا اشادى. جاڭا وقۋ جىلىن ءبىز ۇلكەن جوسپارلارمەن, ۇكىلى ۇمىتپەن باستاپ وتىرمىز. سىزدەردىڭ ارقايسىڭىز ەلىمىزدىڭ بولاشاعى ءۇشىن ولشەۋسىز ۇلەس قوسىپ كەلەسىزدەر. بيىلعى وقۋ جىلى وقۋشىلارىمىز بەن ۇستازدارىمىزدى جاڭا بيىكتەردى باعىندىرۋعا شابىتتاندىراتىن جەتىستىكتەر مەن جەڭىستەرگە تولى بولسىن دەپ تىلەيمىن! ءبىلىم كۇنى قۇتتى بولسىن!», – دەدى مينيستر.

ايتا كەتەيىك, بۇگىن قازاقستان بويىنشا مەكتەپ وقۋشىلارى جاڭا وقۋ جىلىن باستادى. ەلدە شامامەن 4,1 ميلليون وقۋشى بار, ولاردىڭ شامامەن 360 مىڭنان استامى مەكتەپ تابالدىرىعىن العاش رەت اتتاپ وتىر. جاڭا وقۋ جىلىندا 83 جاڭا مەكتەپ ءوز ەسىگىن ايقارا اشتى, ونىڭ ىشىندە 57 مەكتەپ «كەلەشەك مەكتەپتەرى» ۇلتتىق جوبا اياسىندا سالىنعان.