Mınıstr: Medbıkeler endi vıdeojeton taǵady

Foto: ashyq derekkóz

Qazaqstanda emhana men aýrýhanalar qyzmetkerleri úshin vıdeojetondar engizý josparlanyp jatyr. Muny densaýlyq saqtaý mınıstri Aqmaral Álnazarova aıtty, dep habarlaıdy  qandastar.kz

2024 jyldyń jeltoqsan aıynda mınıstr jedel járdem qyzmetkerleri úshin vıdeojetondar shyǵarylatynyn habarlady. Joba qazir Astana men Almatyda pılottyq rejımde júzege asyryldy. Osy jyldyń sońyna deıin basqa qalalardy qosý josparlanyp jatyr.

«Biz bul mehanızmdi jedel járdem úshin ǵana emes, basqa mamandarymyz úshin de keńeıtýdi qarastyryp jatyrmyz… Jedel járdem qyzmetkerlerine qatysty máseleni qazir buıryqqa engizdik, endi ekinshi kezeń retinde ambýlatorlyq-emhanalyq qyzmet deńgeıinde dárigerler men medbıkelerdiń qaýipsizdigine arnalǵan jetondardy engizýdi qarastyryp jatyrmyz», – dedi Álnazarova úkimet otyrysynda.

Medıınalyq uıymdar men ákimdikter vıdeojetondardy satyp alady dedi ol.

Jobany júzege asyrýdyń naqty merzimi ázirge belgisiz. Mınıstrdiń aıtýynsha, vedomstvoǵa normatıvtik quqyqtyq aktilerge tıisti ózgerister engizý úshin úsh aı ýaqyt qajet.

Densaýlyq saqtaý mınıstrligi kásibı mindetterin atqarý kezinde medıına qyzmetkerlerine shabýyl jasaǵan tulǵalarǵa qylmystyq jaýapkershilik belgileý týraly usynys engizdi.