«مينيستر مىرزا, جاۋاپكەرشىلىكتى موينىڭىزعا الاسىز با?» زايىتوۆ توتەسىنەن سۇراق قويدى

كولىك ءمينيسترى مارات قاراباەۆ «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جولاۋشىلاردى اۆتوموبيلمەن تاسىمالداۋ سالاسىنداعى كەيبىر مەملەكەتتىك فۋنكتسيالاردى مىندەتتى مۇشەلىككە (قاتىسۋعا) نەگىزدەلگەن ءوزىن-ءوزى رەتتەۋگە بەرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى جونىندە بايانداما جاسادى.

دەپۋتات رينات زايىتوۆ بايانداما جاساعان مينيسترگە توتەسىنەن سۇراق قويدى, – دەپ حابارلايدى qandastar.kz Dalanews.kz-كە سىلتەمە جاساپ.

دەپۋتات زايىتوۆ مينيسترگە بىرقاتار ساۋال جولداپ, تاكسيستەر دۇرلىكسە, ماسەلە قالاي رەتتەلەتىنىن سۇرادى.

«ۇكىمەتتىڭ مۇشەلەرىنىڭ باستاماشىلىعىمەن ماجىلىسكە كەلگەلى بىردە-ءبىر زاڭنىڭ حالىققا پايداسى ءتيىپ, جۇمىس ىستەپ جاتقانىن كورگەن جوقپىن. بالكىم, كورمەي جۇرگەن شىعارمىن, ونى بەتىمە كەلىپ ايتىڭىزدار. قۇرمەتتى مارات كارىمجان ۇلى, بىزدە كاسىپكەرلەردىڭ مۇددەسىن قورعايدى دەگەن ءبىر ەمەس, ەكى پالاتا بار. جول تاسىمالى دەگەن كىشى كاسىپكەرلىك قوي. نەگە سولار باسقارا سالمايدى?! ايتەۋىر بارىنە ءبىر-ءبىر قوجايىن تاۋىپ بەرەمىز. سوندىقتان سىزگە سۇراق: وسىنشاما تاكسيستەردى ەندى وتارلاۋدىڭ قاجەتى قانشا?! ەكىنشى سۇراعىم: بۇلار ءوزى – شۋلى قاۋىم, ەرتەڭ دۇرلىگەتىن بولسا, تاكسيمەن ءجيى جۇرەتىن ادام بولعاننان كەيىن كىم كورىنگەننەن جامان ءسوز ەستىگىمىز كەلمەيدى. دۇرلىگەتىن بولسا, جاۋاپكەرشىلىكتى ءوزىڭىز موينىڭىزعا الاسىز با?» – دەدى زايىتوۆ.

مينيستر بۇل ماسەلەدە ءبىرىنشى كەزەكتە وزىنە جاۋاپكەرشىلىك الاتىنىن جەتكىزدى.

«مەملەكەتتىك ورگاننىڭ ءبىرىنشى باسشىسى رەتىندە جاۋاپكەرشىلىكتى موينىما الامىن. ءبىرىنشى سۇراعىڭىز بويىنشا, تاكسيدى ءبىز دە بىرنەشە رەت جينادىق. مينيسترلىكتە دە, جەكە دە جينادىق. شىنى كەرەك, الپاۋىت ينتەرنەت اگرەگاتتاردىڭ قاسىندا ولاردىڭ قۇقىعىن قورعايتىن ەشكىم قالمادى. سوندىقتان ەكەۋى ءبىر ءوزىن-ءوزى رەتتەيتىن ۇيىمعا مۇشە بولعان سوڭ, ولاردىڭ قابىلداعان قاعيداسىندا ەڭ الدىمەن ءبىزدىڭ قاراپايىم جۇرگىزۋشىلەر وزدەرىنىڭ قۇقىقتارىن قورعايتىن تالاپتاردى قويا الادى جانە سونى تالاپ ەتە الادى. سوندىقتان ءوزىن-ءوزى باسقارۋ – رەتتەۋ ۇيىمى قازاقستاننىڭ قاراپايىم جۇرگىزۋشىلەرىنىڭ مۇددەسىن قورعاۋعا باعىتتالعان», – دەپ جاۋاپ بەردى مينيستر.