Mınıstr Nazarbaev mektepterine shabýyl jasamaýǵa shaqyrdy

Beısembaev ne deıdi?

– Nazarbaev mektepteri – ozyq tájirıbesi bar, aldyńǵy qatarly mektepterdiń biri. Qazaqstandaǵy bilim júıesine óziniń tıisti úlesin qosyp otyrǵan oryssha aıtqanda “dostoıanııamyz”, qazaqsha aıtqanda baılyǵymyz. Sondyqtan, túrli qatelikti izdeý arqyly shabýyl jasap, ondaı mektepterdiń jumysyna kedergi keltirmeý kerek dep oılaımyn, – dedi Ǵanı Beısembaev.

Mınıstr Nazarbaev Zııatkerlik mektepterine Joǵarǵy aýdıtorlyq palata úlken tekserýlerdi júrgizip, jaqynda aıaqtaǵanyn, sonyń qorytyndysy boıynsha birneshe usynystar aıtylyp, talaptar qoıylǵanyn habarlady.

– Mektepte tamaqtanýǵa memleket tarapynan aqsha bólinip otyrǵan joq. NZM ishki resýrstary arqyly balalardy tamaqtandyrý máselesin sheship otyr. Buǵan deıin de kıim-keshekpen qamtý máselesi bolǵan. Qazir kóp mektepterge qarajat bólýdiń qajettiligi qaıta qaralyp jatyr, – dedi ol.

NZM basshysymen suhbat

Ulysmedia.kz saıtynyń bas redaktory Samal Ibraeva buǵan deıin NZM basqarma tóraǵasy Ánýar Janǵozınmen habarlasyp, NZM-niń qazirgi jaǵdaıy qalaı,  eks-prezıdent olarǵa baryp tura ma, aldaǵy taǵdyry ne bolmaq degen suraqtarǵa jaýap alǵan edi.

Qazaqstanda elimizdiń eks-prezıdenti Nursultan Nazarbaevtyń bastamasymen qurylǵan jáne onyń qurmetine atalǵan Nazarbaev Zııatkerlik mektepteri (NZM) bar. Bul mektepterdiń jaǵdaıy basqalaryna qaraǵanda tym jaqsy bolǵany aıtpasa da túsinikti. Qarjylandyrý bolsyn, pedagogıkalyq quramy bolsyn, avtonomdyq basqarý júıesi bolsyn, áıteýir jyly-jumsaqtyń bári solardyń aýzynda boldy. Balańyzdy NZM-ge túsirseńiz jetip jatyr, keleshegine alańdamasańyz da bolady. Batystyń JOO-na oqýǵa túsý deısiz be, karerlik ósý deısiz be, ózdiginen bola beretin ıgilikter esigi ashylatyn. Alaıda Jańa Qazaqstannyń jarııalanýy jaǵdaıdy birshama ózgertti. Mektepterge bólinetin qarjy kúrt qysqardy, mektepterdiń atyn ózgertedi eken degen áńgime shyqty. Osyǵan baılanysty qordalanǵan suraqtardyń bárine Ánýar Janǵozın jaýap bergen edi.