مينيستر ۋاقىت بەلدەۋىنە قاتىستى مونيتورينگتىك توپ قۇرىلعانىن ايتتى

فوتو: اشىق دەرەككوز

دەنساۋلىق ساقتاۋ ءمينيسترى اقمارال ءالنازاروۆا ۋاقىت بەلدەۋىنە قاتىستى قازاقستاندىقتاردىڭ كوڭىل كۇيى تۋرالى سۇراققا جاۋاپ بەردى. اتاپ ايتقاندا, شەنەۋنىكتەن ۋاقىتتىڭ اۋىسۋى قازاقستاندىقتاردى كۇيزەلىسكە ۇشىراتتى ما دەگەن سۇراق قويىلدى, دەپ جازادى qandastar.kz

ۇكىمەتتە وتكەن بريفينگتە دەنساۋلىق ساقتاۋ مينيسترىنە قازاقستاندىقتاردان كۇندىزگى ساعاتتىڭ قىسقارۋىنان تۋىنداعان دەپرەسسيالىق جاعدايعا بايلانىستى وتىنىشتەر مەن شاعىمدار تۇسكەن-تۇسپەگەنىن سۇرادى.

ۆەدومستۆو باسشىسى قازاقستاندىقتاردىڭ دەنساۋلىق جاعدايىن باقىلايتىن ارنايى مونيتورينگتىك توپ قۇرىلعانىن ايتتى.

«بىرىڭعاي ۋاقىت بەلدەۋى تۋرالى شەشىم قابىلدانعاننان كەيىن دەنساۋلىق ساقتاۋ مينيسترلىگى قوعامدىق دەنساۋلىق ساقتاۋ ۇلتتىق ورتالىعىنىڭ بازاسىندا حالىقتىڭ دەنساۋلىعىنىڭ كورسەتكىشتەرىنە مونيتورينگ جۇرگىزەتىن توپ قۇردى ءبىز الداعى ءۇش جىلدا عىلىمي نەگىزدە ۇزاق مەرزىمدى مونيتورينگ جۇرگىزۋ ءۇشىن جوبا دايىنداپ جاتىرمىز. بۇل تۋرالى پىكىر ايتۋ ءۇشىن وتىنىشتەردى تىركەۋ كەرەك», – دەدى ءالنازاروۆا.

سونداي-اق جۋرناليستەر ءمينيستردىڭ ۋاقىتتىڭ وزگەرۋىنە جانە «17:00-دە سىرتتا قاراڭعى بولىپ قالعانىنا» قالاي قارايتىنىن سۇرادى.

«دەنساۋلىعىما قاتىستى شاعىمدار جوق. بۇل ءۇشىن ءتيىستى جۇمىس توبى قۇرىلدى», – دەدى دەنساۋلىق ساقتاۋ ءمينيسترى.

ەسكە سالايىق, بۇعان دەيىن دەپۋتاتتار ۋاقىت بەلدەۋى ماسەلەسى ءماجىلىس وتىرىسىندا قارالاتىنىن ايتتى. 1 ناۋرىزدا قازاقستاننىڭ بارلىق ايماعى ءبىر ۋاقىت بەلدەۋىنە اۋىستى. بۇدان بولەك بىرىڭعاي ۋاقىت بەلدەۋىنە قارسى پەتيتسيا 50 مىڭ قول جيناعانى تۋرالى جازعان ەدىك. ال مينيسترلىك بىرىڭعاي ۋاقىت بەلدەۋىنە قارسى پەتيتسيانى قاناعاتتاندىرماي قويدى.