ءبىلىم
مينيستر ۇبت-دا 140 بالل جيناعان تۇلەكتى قۇتتىقتادى
قر عىلىم جانە جوعارى ءبىلىم ءمينيسترى ساياسات نۇربەك ۇلتتىق بىرىڭعاي تەستىلەۋدەن 140 بالل جيناعان جانىبەك ءابىلحاندى قۇتتىقتادى, دەپ جازدى qandastar.kz
جوعارى ناتيجە كورسەتكەن تالاپكەر – تۇركىستان وبلىسى, ورداباسى اۋدانىنىڭ مەكتەبىنىڭ تۇلەگى. مينيستر جانىبەكتى جەتىستىگىمەن قۇتتىقتاپ, اتا-اناسىنا العىس ءبىلدىردى. سونداي-اق تالاپكەرگە العىس حات پەن ەستەلىك سىيلىق تابىستادى.
كەزدەسۋ بارىسىندا مينيستر ەلىمىزدەگى جوعارى ءبىلىم بەرۋ سالاسىنداعى مۇمكىندىكتەر مەن قازاقستاندا اشىلعان شەتەلدىك جوعارى وقۋ ورىندارىنىڭ الەۋەتىنە توقتالدى.
– ءبىز قاراپايىم اۋىل مەكتەبىنىڭ تۇلەگى ەڭ جوعارى بالل جيناعانىنا ەرەكشە قۋانامىز. مەملەكەت تاراپىنان ونىڭ ءبىلىمىن ءارى قاراي دامىتۋىنا تولىق قولداۋ كورسەتىلەدى. بۇگىندە قازاقستان وڭىرلىك اكادەميالىق حاب رەتىندە قالىپتاسىپ كەلەدى. ەلدە قۇرىلعان ءبىلىم بەرۋ ەكوجۇيەسى حالىقارالىق سەرىكتەستەردىڭ قىزىعۋشىلىعىن ارتتىرىپ جاتىر. جەتەكشى شەتەلدىك ۋنيۆەرسيتەتتەرمەن بىرلەسە وتىرىپ, جاڭا ءبىلىم بەرۋ باعدارلامالارى جۇزەگە اسىرىلۋدا. بۇل جەتىستىكتەر قازاقستاننىڭ ءبىلىم بەرۋ جۇيەسىنىڭ حالىقارالىق دەڭگەيدە مويىندالعانىن كورسەتەدى, – دەدى ساياسات نۇربەك.
ايتا كەتەيىك, جانىبەك ءابىلحان 19 مامىر كۇنى شىمكەنت قالاسىنداعى ايماقتىق تەستىلەۋ ورتالىعىندا «ماتەماتيكا–ينفورماتيكا» پاندەر كومبيناتسياسى بويىنشا سىناق تاپسىرىپ, ەڭ جوعارى ناتيجە كورسەتتى. استاناعا العاش رەت كەلگەن جانىبەك ەلورداداعى بىرقاتار جوعارى وقۋ ورىندارىن ارالاپ, ءبىلىم بەرۋ ينفراقۇرىلىمىمەن تانىستى.
