مينيستر جاڭا باسشىلار قۇرامىن ىرىكتەۋ ماسەلەسىن كوتەردى

مينيستر مەكتەپكە دەيىنگى, ورتا, تەحنيكالىق جانە كاسىبي ءبىلىم بەرۋ ۇيىمدارىن ارالاپ, ارىپتەستەرىمەن كەزدەستى. ولاردىڭ قاتارىندا ارداگەر ۇستازدار, «قازاقستاننىڭ ەڭبەك سىڭىرگەن ۇستازى» اتاعىنىڭ يەگەرلەرى, پەداگوگ شەبەرلەر, پەداگوگ-زەرتتەۋشىلەر جانە «ۇزدىك پەداگوگ» رەسپۋبليكالىق بايقاۋىنىڭ جەڭىمپازدارى دا بولدى, دەپ جازادى qandastar.kz

پەداگوگتەرمەن كەزدەسۋدە عاني بەيسەمباەۆ ەلىمىزدىڭ يگىلىگى مەن ادامي كاپيتالىن قالىپتاستىرۋدا پەداگوگتىڭ ورنى وراسان زور ەكەنىن اتاپ ءوتتى. سونداي-اق مەملەكەت تاراپىنان پەداگوگيكالىق قاۋىمدى قولداۋ مەن دامىتۋعا باعىتتالعان شارالارعا توقتالىپ ءوتتى. مەملەكەت باسشىسىنىڭ باستاماسىمەن رەسپۋبليكا كۇنى قارساڭىندا تاريحتا ءبىرىنشى رەت بىردەن ەكى ۇستازعا «قازاقستاننىڭ ەڭبەك ەرى» اتاعى بەرىلدى. بۇل ءجايت پەداگوگ مارتەبەسىنىڭ ارتۋىنىڭ, ونىڭ قوعامداعى ءرولى مەن ەڭبەگىنىڭ باعالانۋىنىڭ جاڭا كەزەڭىن ايعاقتايدى.

«قوعامداعى جانە وقۋشىلار الدىنداعى پەداگوگ مارتەبەسى ءبىرىنشى كەزەكتە ونىڭ ادامي قاسيەتتەرىمەن, سودان كەيىن عانا كاسىبي دەڭگەيىمەن انىقتالادى. ەگەر ۇلتتىق قۇندىلىقتار ءبىلىم مەن تاربيەنىڭ نەگىزى بولسا, بۇل قۇندىلىقتاردى بالا بويىنا سىڭىرەتىن مۇعالىم ادالدىق, ادىلەتتىلىك, ادەپتىلىك جانە ەڭبەكسۇيگىشتىك قاسيتەتتەرىنە يە بولۋى ءتيىس. وسى قاسيەتتەر كاسىبي بىلىممەن ۇشتاسقاندا عانا ونى ناعىز ۇستاز دەپ اتاۋعا بولادى. مەكتەپتىڭ تابىستىلىعى مەن بالانىڭ بولاشاعى مۇعالىمگە بايلانىستى ەكەنىن ەستە ساقتاۋ كەرەك, سەبەبى مۇعالىم قانداي بولسا, مەكتەبى سونداي بولماق. سىزدەردىڭ ەڭبەكتەرىڭىز مەملەكەتىمىزدىڭ جارقىن ءارى باقىتتى بولاشاعىنىڭ نەگىزى. سوندىقتان, ءاربىر مۇعالىم ۇزدىكسىز ءبىلىم الۋعا ۇمتىلۋى ءتيىس», – دەدى مينيستر.

عاني بەيسەمباەۆ سونداي-اق ءبىلىم ساپاسىن ارتتىرۋ, ساپالى پەداگوگيكالىق قۇرام قالىپتاستىرۋ, ءبىلىم بەرۋ ينفراقۇرىلىمىن جاقسارتۋ جانە تاعى باسقا ءبىلىم سالاسىنىڭ سۇراقتارىن ارىپتەستەرىمەن بىرگە تالقىلادى. پەداگوگتەر مينيسترمەن ەركىن سۇقباتتاسىپ, ءوز سۇراقتارىن قويدى.

مينيستر ءبىلىم جۇيەسىندە جاڭا باسشىلار قۇرامىن ىرىكتەۋ مەن قالىپتاستىرۋعا ەرەكشە كوڭىل ءبولدى. وڭىرلىك ءبىلىم باسقارماسىنىڭ باسشىسىنا پەداگوگتەردى قولداۋ, جاس ماماندار ءۇشىن قولايلى جاعداي جاساۋ بويىنشا جۇمىستاردى كۇشەيتۋ جانە پەداگوگيكالىق قاۋىمداستىق اراسىندا اقپاراتتىق-ءتۇسىندىرۋ جۇمىستارىن جۇرگىزۋدى تاپسىردى.

قازىرگى تاڭدا جامبىل وبلىسىندا 40 مىڭعا جۋىق پەداگوگ ەڭبەك ەتۋدە, ونىڭ ىشىندە 436-سى پەداگوگ-شەبەر.
جۇمىس ساپارىن قورىتىندىلاي كەلە, مينيستر بىرقاتار ءبىلىم بەرۋ ۇيىمدارىن, ونىڭ ىشىندە «جايلى مەكتەپ» ۇلتتىق جوباسى اياسىندا سالىنعان مەكتەپتەردى تەكسەردى.