Mınıstr jańa basshylar quramyn irikteý máselesin kóterdi

Mınıstr mektepke deıingi, orta, tehnıkalyq jáne kásibı bilim berý uıymdaryn aralap, áriptesterimen kezdesti. Olardyń qatarynda ardager ustazdar, «Qazaqstannyń eńbek sińirgen ustazy» ataǵynyń ıegerleri, pedagog sheberler, pedagog-zertteýshiler jáne «Úzdik pedagog» respýblıkalyq baıqaýynyń jeńimpazdary da boldy, dep jazady qandastar.kz

Pedagogtermen kezdesýde Ǵanı Beısembaev elimizdiń ıgiligi men adamı kapıtalyn qalyptastyrýda pedagogtiń orny orasan zor ekenin atap ótti. Sondaı-aq memleket tarapynan pedagogıkalyq qaýymdy qoldaý men damytýǵa baǵyttalǵan sharalarǵa toqtalyp ótti. Memleket basshysynyń bastamasymen Respýblıka kúni qarsańynda tarıhta birinshi ret birden eki ustazǵa «Qazaqstannyń Eńbek eri» ataǵy berildi. Bul jáıt pedagog mártebesiniń artýynyń, onyń qoǵamdaǵy róli men eńbeginiń baǵalanýynyń jańa kezeńin aıǵaqtaıdy.

«Qoǵamdaǵy jáne oqýshylar aldyndaǵy pedagog mártebesi birinshi kezekte onyń adamı qasıetterimen, sodan keıin ǵana kásibı deńgeıimen anyqtalady. Eger ulttyq qundylyqtar bilim men tárbıeniń negizi bolsa, bul qundylyqtardy bala boıyna sińiretin muǵalim adaldyq, ádilettilik, ádeptilik jáne eńbeksúıgishtik qasıtetterine ıe bolýy tıis. Osy qasıetter kásibı bilimmen ushtasqanda ǵana ony naǵyz ustaz dep ataýǵa bolady. Mekteptiń tabystylyǵy men balanyń bolashaǵy muǵalimge baılanysty ekenin este saqtaý kerek, sebebi muǵalim qandaı bolsa, mektebi sondaı bolmaq. Sizderdiń eńbekterińiz memleketimizdiń jarqyn ári baqytty bolashaǵynyń negizi. Sondyqtan, árbir muǵalim úzdiksiz bilim alýǵa umtylýy tıis», – dedi mınıstr.

Ǵanı Beısembaev sondaı-aq bilim sapasyn arttyrý, sapaly pedagogıkalyq quram qalyptastyrý, bilim berý ınfraqurylymyn jaqsartý jáne taǵy basqa bilim salasynyń suraqtaryn áriptesterimen birge talqylady. Pedagogter mınıstrmen erkin suqbattasyp, óz suraqtaryn qoıdy.

Mınıstr bilim júıesinde jańa basshylar quramyn irikteý men qalyptastyrýǵa erekshe kóńil bóldi. О́ńirlik bilim basqarmasynyń basshysyna pedagogterdi qoldaý, jas mamandar úshin qolaıly jaǵdaı jasaý boıynsha jumystardy kúsheıtý jáne pedagogıkalyq qaýymdastyq arasynda aqparattyq-túsindirý jumystaryn júrgizýdi tapsyrdy.

Qazirgi tańda Jambyl oblysynda 40 myńǵa jýyq pedagog eńbek etýde, onyń ishinde 436-sy pedagog-sheber.
Jumys saparyn qorytyndylaı kele, mınıstr birqatar bilim berý uıymdaryn, onyń ishinde «Jaıly mektep» ulttyq jobasy aıasynda salynǵan mektepterdi tekserdi.