مينيستر جاۋابى: ءمامس-كە ارتىق تولەنگەن اقشانى قالاي قايتارىپ الۋعا بولادى?

فوتو: اشىق دەرەككوز

بىرنەشە جەردە جۇمىس ىستەيتىن ازاماتتاردىڭ ءمامس جۇيەسىنە سالعان جارناسى مەملەكەت بەكىتكەن نورمادان اسىپ كەتسە, ارتىق قاراجاتتى قايتارىپ الۋىنا بولادى. بۇل تۋرالى ماجىلىستە وتكەن ۇكىمەت ساعاتىندا دەنساۋلىق ساقتاۋ ءمينيسترى اقمارال ءالنازاروۆا ايتتى, دەپ جازدى qandastar.kz

ءماجىلىس دەپۋتاتى ەرلان سايروۆ مينيستردەن ەكى نەمەسە ءۇش جەردە جۇمىس ىستەيتىن ادامداردىڭ مەديتسينالىق جارنا تولەۋ ءتارتىبى تۋرالى سۇرادى.

«ەگەر ازامات ەكى جەردە جۇمىس ىستەسە, جارنا ەكى جەردەن تولەنەدى. بىراق ول ءبىر جىل ىشىندە ەمحاناعا جۇگىنبەسە, اقشاسى سول كۇيى پايدالانىلماي قالادى. بۇل ادىلەتسىز عوي. مەنىڭشە, ءار ادامعا ءمامس بويىنشا تولەمدەردى باقىلاپ, باسقارۋ ءارى قانداي قىزمەت الاتىنى جونىندە اقپارات الۋ قۇقى بەرىلۋى كەرەك. بۇل اقشانى ازاماتتار قاجەت كەزدە مەديتسينالىق قىزمەت الۋ ءۇشىن ءوز اقشاسى سەكىلدى پايدالانۋى قاجەت», – دەدى دەپۋتات.

مينيستر ساقتاندىرۋى بار ادامدارعا مەديتسينالىق قىزمەت تەگىن كورسەتىلەتىنىن اتاپ ءوتتى. ەكى نەمەسە ءۇش جەردە جۇمىس ىستەيتىندەردەن ساقتاندىرۋعا بارلىق جۇمىسىنان جارنا ۇستالادى. وسى رەتتە جارنا كولەمى 850 مىڭنان اسىپ كەتسە, ازاماتتار ارتىق قاراجاتتى ساقتاندىرۋ قورىنان قايتارىپ الۋعا ءوتىنىش بەرە الادى.

«ەكى نەمەسە ءۇش جەردە جۇمىس ىستەيتىن ازاماتتاردىڭ بارلىق جەردەن جارناپۇلدارى ۇستالادى. بىراق بارلىعىن قوسقاندا ول 850 مىڭ تەڭگەدەن, ياعني 10 ەسەلەنگەن ەڭ تومەنگى جالاقى كولەمىنەن اسپاۋى كەرەك. اسقان جاعدايدا ول ادام ءمامس-ءتىڭ جەرگىلىكتى فيليالىنا ءوتىنىش بەرىپ, ۇستىندەگى قاراجاتتى قايتارۋعا مۇمكىندىگى بار», – دەپ ناقتىلادى مينيستر.