Mınıstr jaýaby: MÁMS-ke artyq tólengen aqshany qalaı qaıtaryp alýǵa bolady?

Foto: ashyq derekkóz

Birneshe jerde jumys isteıtin azamattardyń MÁMS júıesine salǵan jarnasy memleket bekitken normadan asyp ketse, artyq qarajatty qaıtaryp alýyna bolady. Bul týraly Májiliste ótken Úkimet saǵatynda Densaýlyq saqtaý mınıstri Aqmaral Álnazarova aıtty, dep jazdy qandastar.kz

Májilis depýtaty Erlan Saırov mınıstrden eki nemese úsh jerde jumys isteıtin adamdardyń medıınalyq jarna tóleý tártibi týraly surady.

«Eger azamat eki jerde jumys istese, jarna eki jerden tólenedi. Biraq ol bir jyl ishinde emhanaǵa júginbese, aqshasy sol kúıi paıdalanylmaı qalady. Bul ádiletsiz ǵoı. Menińshe, ár adamǵa MÁMS boıynsha tólemderdi baqylap, basqarý ári qandaı qyzmet alatyny jóninde aqparat alý quqy berilýi kerek. Bul aqshany azamattar qajet kezde medıınalyq qyzmet alý úshin óz aqshasy sekildi paıdalanýy qajet», – dedi depýtat.

Mınıstr saqtandyrýy bar adamdarǵa medıınalyq qyzmet tegin kórsetiletinin atap ótti. Eki nemese úsh jerde jumys isteıtinderden saqtandyrýǵa barlyq jumysynan jarna ustalady. Osy rette jarna kólemi 850 myńnan asyp ketse, azamattar artyq qarajatty saqtandyrý qorynan qaıtaryp alýǵa ótinish bere alady.

«Eki nemese úsh jerde jumys isteıtin azamattardyń barlyq jerden jarnapuldary ustalady. Biraq barlyǵyn qosqanda ol 850 myń teńgeden, ıaǵnı 10 eselengen eń tómengi jalaqy kóleminen aspaýy kerek. Asqan jaǵdaıda ol adam MÁMS-tiń jergilikti fılıalyna ótinish berip, ústindegi qarajatty qaıtarýǵa múmkindigi bar», – dep naqtylady mınıstr.