ءبىلىم
مينيستر جاۋابى: مەكتەپ ءبىتىرۋ كەشىنە اقشا جيناعان دۇرىس پا?
فوتو: اشىق دەرەككوز
وقۋ-اعارتۋ ءمينيسترى عاني بەيسەمباەۆ مەكتەپ ءبىتىرۋ كەشىنە اقشا جيناۋعا قاتىستى سۇراققا جاۋاپ بەردى, دەپ حابارلايدى qandastar.kz
«جۋىردا ءبىر وقۋشىنىڭ اتا-اناسى مەكتەپ ءبىتىرۋ كەشىنە 200 مىڭ تەڭگە جيناپ جاتقانىن ايتتى. بۇل جاعداي زاڭمەن رەتتەلگەن بە? سونىمەن قاتار, وزگە دە مەرەكەلەردە اقشا جينالاتىنى بايقالادى. ءسىزدىڭ كوزقاراسىڭىز قانداي?» – ۇكىمەتتىڭ ءباسپاسوز ءماسليحاتىندا جۋرناليستەردىڭ ءبىرى مينيسترگە وسىنداي سۇراق قويدى.
بەيسەمباەۆ بۇل ماسەلەنىڭ زاڭ جۇزىندە رەتتەلگەنىن اتاپ ءوتتى. ونىڭ ايتۋىنشا, قازىرگى تاڭدا مۇنداي جاعدايلار باقىلاۋعا الىنعان.
«مۇنداي باستامالاردىڭ كوبىسى اتا-انالاردىڭ ءوز ەركىمەن جۇزەگە اسادى. سوندىقتان بارلىق جاۋاپكەرشىلىكتى مەكتەپ اكىمشىلىگىنە ارتىپ قويۋ دۇرىس ەمەس. ادەتتە, مەكتەپ باسشىلىعى مۇنداي جيىندارعا تىكەلەي ارالاسا المايدى. سول سەبەپتى اتا-انالاردىڭ وزدەرى دە ارتىق شىعىندارعا جول بەرمەۋ كەرەك ەكەنىن ءتۇسىنۋى قاجەت. دەگەنمەن مەكتەپتەرگە دە بۇل جونىندە ەسكەرتۋ بەرىلدى. كەيبىر وڭىرلەردە ءالى دە بولسا اقشا جيناۋ فاكتىلەرى تىركەلىپ جاتىر. سوندىقتان بۇل ماسەلەدە اتا-انالار مەن مەكتەپ اكىمشىلىگى بىردەي جاۋاپتى بولۋعا ءتيىس», – دەدى عاني بەيسەمباەۆ.
