Mınıstr jaýaby: Mektep bitirý keshine aqsha jınaǵan durys pa?

Foto: ashyq derekkóz

Oqý-aǵartý mınıstri Ǵanı Beısembaev mektep bitirý keshine aqsha jınaýǵa qatysty suraqqa jaýap berdi, dep habarlaıdy qandastar.kz

«Jýyrda bir oqýshynyń ata-anasy mektep bitirý keshine 200 myń teńge jınap jatqanyn aıtty. Bul jaǵdaı zańmen rettelgen be? Sonymen qatar, ózge de merekelerde aqsha jınalatyny baıqalady. Sizdiń kózqarasyńyz qandaı?» – Úkimettiń baspasóz máslıhatynda jýrnalısterdiń biri mınıstrge osyndaı suraq qoıdy.

Beısembaev bul máseleniń zań júzinde rettelgenin atap ótti. Onyń aıtýynsha, qazirgi tańda mundaı jaǵdaılar baqylaýǵa alynǵan.

«Mundaı bastamalardyń kóbisi ata-analardyń óz erkimen júzege asady. Sondyqtan barlyq jaýapkershilikti mektep ákimshiligine artyp qoıý durys emes. Ádette, mektep basshylyǵy mundaı jıyndarǵa tikeleı aralasa almaıdy. Sol sebepti ata-analardyń ózderi de artyq shyǵyndarǵa jol bermeý kerek ekenin túsinýi qajet. Degenmen mektepterge de bul jóninde eskertý berildi. Keıbir óńirlerde áli de bolsa aqsha jınaý faktileri tirkelip jatyr. Sondyqtan bul máselede ata-analar men mektep ákimshiligi birdeı jaýapty bolýǵa tıis», – dedi Ǵanı Beısembaev.