«مينيسترلەردىڭ بەتىن قىزارتپاي-اق قويايىن»: زايىتوۆ ۇكىمەتكە سىن ايتتى

فوتو: كوللاج: Massaget.kz

بۇگىن بيۋدجەت ماسەلەلەرى تالقىلانىپ جاتقان پارلامەنت وتىرىسىنا ولجاس بەكتەنوۆ باستاعان مينيسترلەر كابينەتى كەلدى. ءماجىلىس دەپۋتاتى رينات زايىتوۆ ۇكىمەت باسشىسى بەكتەنوۆكە بىرنەشە سۇراق قويىپ, مينيسترلەردىڭ جۇمىسىنا قاتىستى سىن ايتتى, – دەپ حابارلايدى Qandastar.kz Massaget.kz تىلشىسىنە سىلتەمە جاساپ.

«ولجاس اباي ۇلى, جالپى مينيسترلەر كابينەتىندە مەملەكەت باسشىسىنىڭ تاپسىرماسى بويىنشا 400 جايلى مەكتەپ سالىنۋى كەرەك ەدى. ونىڭ سانى 369-عا ءتۇسىپ, 157-گە ءالى اقشا جوق بولىپ وتىر. 2024 جىلدىڭ ساۋىرىنەن باستاپ ەڭ تومەنگى جالاقى مولشەرىن 85 مىڭ تەڭگەگە ۇلعايتۋ كەرەك ەدى. بۇل دا مەملەكەت باسشىسىنىڭ تاپسىرماسى. كەشە ەكونوميكا ءمينيسترىنىڭ ايتۋىنشا, مۇندا دا قوزعالىستار جوق. 2025 جىلعا دەيىن جەرگىلىكتى جولداردىڭ 95%-ى جوندەلۋى كەرەك ەدى. بۇل دا ىسكە اسۋى نەعايبىل ەكەنىمەن كەلىسەتىن شىعارسىزدار. تاعىسىن تاعى, جەتىپ جاتىر. ەلگە بەرگەن, بىزگە بەرگەن ۋادەلەردى ايتىپ, ەشكىمنىڭ بەتىن قىزارتپاي-اق قويايىن. وسى ورايدا سۇراق: «مينيسترلەر كابينەتىندە ءسوزدىڭ ءباتۋاسىنىڭ بولماۋىنىڭ سەبەبى نەدە?» جانە ءسىزدىڭ وسىنىڭ الدىن الۋ ءۇشىن الدا قانداي جوسپارىڭىز بار?» – دەپ ساۋال جولدادى رينات زايىتوۆ.

بەكتەنوۆتىڭ جاۋابى

ۇكىمەت باسشىسى اتالعان تاپسىرمالاردىڭ ۋاقىتىندا ورىندالماۋى بيۋدجەتتەگى قاراجات تاپشىلىعىمەن بايلانىستىردى.

«ۇكىمەتتىڭ جۇمىسى – مەملەكەت باسشىسىنىڭ تاپسىرماسىن ورىنداۋعا باعىتتالعان. بارلىق ءىس-ارەكەتىمىز سوعان بايلانىستى. بيۋدجەتتى قاراعان كەزدە 32 ترلن تەڭگەگە وتىنىمدەر ءتۇستى. بىراق قولىمىزدا بار قاراجات 15-اق ترلن تەڭگە. وسى قاراجاتتىڭ شەڭبەرىندە بارلىق جۇمىستاردى ۇيىمداستىرىپ جاتىرمىز. ارى قاراي ەكونوميكامىزدى دامىتىپ, جوعارى وندىرىلگەن تاۋارلاردى ەلدە ءوندىرۋىمىز كەرەك», – دەپ جاۋاپ بەردى ولجاس بەكتەنوۆ.

ايتا كەتەيىك, بۇگىن پارلامەنتتە «2025-2027 جىلدارعا ارنالعان رەسپۋبليكالىق بيۋدجەت تۋرالى» زاڭ جوباسى قارالىپ جاتىر.