Mınıstrlik 67 mln dollar turatyn joıǵysh ushaqtan aıyryldy

Foto YouTube platformasynan alyndy. Avtorlyǵy: Navy Media kanaly

Associated Press agenttiginiń habarlamasyna súıengen Aikyn.kz, qymbat ushaqtyń sýǵa ketý sebebin túsindiredi, dep jazdy qandastar.kz

Ushaq angarǵa súırelip bara jatqanda palýbadan qulap, teńizge batyp ketken. Foto edition.cnn.com saıtynan alyndy. Avtorlyǵy: H (Twitter)

Amerıkalyq úkimet dúısenbi kúni (28 sáýir) óte qymbat áskerı ushaqtan aıyrylǵanyn moıyndady. О́tken aptada joıǵysh ushaq júzip bara jatqan USS Harry S. Truman ushaq tasyǵysh kemesinen syrǵyp, sýǵa túsip ketken.

F/A-18 Super Hornet joıǵysh ushaq belgisiz sebeptermen Iemendegi hýsıt búlikshileriniń shabýylyna ushyraǵan kezde palýbadan qulap, sýǵa batqan. Bul týraly Associated Press agenttigi habarlady. 

USS Truman birneshe aı boıy atalǵan aımaqta terrorıstik toptardyń áreketin tejep otyrýǵa baǵyttalǵan mıssııasynyń bir bóligi retinde Qyzyl teńizge jiberilgen. AQSh Áskerı-teńiz kúshteriniń resmı málimdemesinde bylaı delingen:

«F/A-18E ushaǵy angarǵa súırelip bara jatqanda, ekıpaj basqarýdy joǵaltty. Nátıjesinde ushaq pen ony súırep bara jatqan tehnıka sýǵa qulady. Ushaqty súıregen teńizshiler shetke shyǵyp úlgerdi. Qazir oqıǵa boıynsha tergeý júrip jatyr».

Keme hýsıtterdiń atqylaýynan qashyp kúrt burylǵanda, ushaq palýbadan syrǵyp ketip, teńizge qulaǵan. Foto naked-science.ru saıtynan alyndy. Avtorlyǵy: U.S. Navy

Oqıǵa ornynan alynǵan alǵashqy esepterge sáıkes, USS Harry S. Truman kemesi hýsıtterdiń atqylaýynan qashý úshin kúrt burylǵanda, joıǵysh ushaq palýbadan syrǵyp ketken. Ushaq teńizge qulap, birden sý túbine ketken. Bul oqıǵadan bir teńizshi jeńil jaraqat alǵany aıtyldy.

2012 jylǵy málimetter boıynsha ushaqtyń baǵasy shamamen 67 mıllıon dollar. Dál osy USS Harry S. Truman ushaq tasyǵysh kemesinen 2022 jyldyń 8 shildesinde taǵy bir F/A-18 ushaǵy Jerorta teńizine qulaǵan edi. Bundaı qaıtalanýlar kemeniń ekıpajynyń qateliginen nemese ushaqtaǵy kemshilikterden bolýy múmkin.

USS Harry S. Truman 90-ǵa jýyq ushaq pen tikushaqtar tasymaldaıtyn Nimitz sanatyndaǵy atom qozǵaltqyshy bar ushaq tasyǵysh keme. Ushaq tasymaldaýshy kemelerde bundaı oqıǵalar óte sırek kezdesedi. О́ıtkeni ushaqtar kemege myqty bekitiledi. Biraq hýsıtterdiń Qyzyl teńizdegi zymyrandar men drondary AQSh áskerı kemeleriniń shuǵyl manevrlar jasaýǵa májbúr etedi. Sondaı bir burylysta F/A-18 ushaǵy teńizge qulap ketken bolýy múmkin.

Bıylǵa aqpan aıynda Mysyrdyń portynda saýda kemesimen soqtyǵysyp qalǵan osy USS Harry S. Truman kemesiniń komandıri qyzmetinen qýylǵan edi. Bul kemeniń keleńsiz oqıǵalarǵa jıi tap bolýy da úlken máseleniń bar ekenin ańǵartady.

USS Harry S. Truman kemesiniń qazirgi jaǵdaıy týraly myna vıdeoda:

Qorǵanys mınıstrine taǵy bir soqqy boldy

Bul oqıǵa – Qorǵanys mınıstri Pıt Hegset úshin kezekti qıyndyq týǵyzdy. Fox News-tiń burynǵy telejúrgizýshisi retinde tanymal Hegset bul qyzmetke kelgennen beri birneshe daýly jaǵdaıǵa ushyraǵan.

О́tken aıda ol qatelesip, hýsıtterge qarsy áskerı josparlardy The Atlantic jýrnalynyń bas redaktoryna Signal arqyly jiberip qoıǵan. Keıinirek bul málimetterdi qyzmettik chatqa tirkelgen áıeline, baýyryna jáne advokatyna da taratqany belgili boldy. Sońǵy málimetterge qaraǵanda, ol Signal qosymshasyn jeke kompıýterine «baqylaýsyz arna» arqyly ornatyp, qaýipsizdik protokoldaryn buzǵan.

Hegsetke ımıdjge tym qumar, biraq basqarý qabileti tómen degen syndar aıtylýda. Sondaı-aq, ol jaqynda Pentagonda «bet-álpet túzetý stýdııasyn» ornatyp, sheneýnikterdi medıa aldynda jaqsy kórinýge daıyndaýǵa tyrysqany úshin de synǵa ushyrady.