قارجى جانە تولەمدەر
مينيسترلىك قارجىلىق تاۋەكەلدەن قورعايتىن «ستوپ كرەديت» قىزمەتىن ىسكە قوستى
فوتو: اشىق دەرەككوز
قازاقستان رەسپۋبليكاسىنىڭ تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى ازاماتتارعا ستوپ-كرەديت (بانكتىك نەسيەلەردى, ميكروكرەديتتەردى الۋدان ەرىكتى باس تارتۋ) قىزمەتىن قوسۋ مۇمكىندىگى تۋرالى ەسكە سالادى, – دەپ جازادى qandastar.kz
ەندى قىزمەت «eGov mobile» ءموبيلدى قوسىمشاسىندا جانە «ەلەكتروندىق ۇكىمەت» ۆەب-پورتالىنىڭ باستى بەتتە قولجەتىمدى. قىزمەتتى ەتسق ارقىلى نەمەسە لوگين مەن ءپارولدى قولدانۋ ارقىلى قوسىلۋعا بولادى. ول ءۇشىن سايتتىڭ باستى بەتىندە «سەرۆيستەر» بولىمىنە ءوتىپ, «بانكتىك نەسيەلەردى, ميكروكرەديتتەردى الۋدان ەرىكتى باس تارتۋ» وپتسياسىن تاڭداۋ قاجەت.
قىزمەت شەكسىز مەرزىمگە ىسكە قوسىلادى جانە ازاماتتىڭ ءوتىنىشى بويىنشا ءوشىرىلۋى مۇمكىن.
مينيسترلىك كيبەرقاۋىپسىزدىك شارالارىن ساقتاۋدىڭ ماڭىزدىلىعىن ەسكە سالادى جانە ۇسىنىستاردى ورىنداۋعا شاقىردى:
- ءار ءتۇرلى اككاۋنتتار ءۇشىن كۇردەلى جانە بىرەگەي پارولدەردى پايدالانۋ.
- قۇرىلعىلارداعى باعدارلامالىق قامتاماسىز ەتۋدى ۇنەمى جاڭارتىپ وتىرۋ.
- كۇماندى سىلتەمەلەر مەن حابارلامالاردى اشپاۋ.
- انتيۆيرۋس باعدارلامالارىن پايدالانۋ.
- جەكە اقپاراتتى بوگدە سايتتارعا جانە قوسىمشالارعا سەنبەۋ.
- اككاۋنتتار ءۇشىن ەكى فاكتورلى اۋتەنتيفيكاتسيانى پايدالانۋ.
- الەۋمەتتىك جەلىلەردەگى قۇپيالىلىق پارامەترلەرىن تەكسەرۋ.
- 1414-تەن كەلگەن كودتاردى ءۇشىنشى تۇلعالارعا بەرمەۋ.
- بانكتىك رەكۆيزيتتەردى ءۇشىنشى تۇلعالارعا حابارلاماۋ.
وسى نۇسقاۋلاردى ورىنداۋ دەرەكتەرىڭىزدى قورعاۋعا جانە قارجىلىق تاۋەكەلدەردى بولدىرماۋعا كومەكتەسەدى.
